Concerto

Con A pelo (banda tributo) mergullámonos no universo de Platero y tú, revivindo a emoción e a enerxía das súas actuacións lendarias. Cada acorde, cada riff e cada letra transpórtanos a través do tempo, lembrándonos por que estas cancións son eternas. Desde os momentos de euforia ata as baladas melancólicas, A pelo captura a esencia mesma do espírito do rock español, celebrando a autenticidade e a paixón que definiron a Platero y tú como unha das bandas máis queridas da súa época.

Jay Doe & The Blues Preachers fan música de raíz afroamericana baseada no blues clásico. A banda está liderada por Javier Casal, que tras o seu paso por distintas formacións, en 2015, xa en solitario, deixa escapar o seu 'alter ego' máis bluseiro co nome de Jay Doe. Versións de Robert Johnson, Jimmy Reed, Brownie McGhee, Muddy Waters, Big Bill Broonzy, Elmor James, combinándoas con temas máis populares de Clapton ou os Stones e facendo algunha incursión en temas de películas moi coñecidas sempre en torno ao blues, rythm and blues, country e escarceos co swing e jazz.

Stormy Trucks tocan rocknroll; puro son e diversión. Sen trucos, á vella usanza dos tríos deste estilo, combinando cancións propias con revisións dos clásicos. Nos seus concertos presentan o seu último traballo, Dark Lady (Struck By Lightning, 2024), que inclúe cinco temas orixinais e dúas versións absolutamente persoais de clásicos, e onde aplican un xiro máis á súa forma de concibir o rock and roll con frescura inxectada aos sons clásicos, composicións impecables e todo envolto no potente son que xa se converteu no seu selo.

A Ukestra do medio é unha proposta orixinal e chea de frescura que alberga influencias de rock’nroll, country, swing, pop e surf. Ademais das voces, o caixón e os distintos tipos de ukeleles: sopranos, tenores, barítonos e baixos, incorporan a pandeireta, a táboa de lavar, o güiro, o xilófono, o oviño shaker, o vibraslap ou a cuica. Un compendio de instrumentos miúdos a través dos cales marcan o ritmo de pequenas historias sobre o amor, as expectativas truncadas ou os tempos pasados. Letras graves, ás veces, que contrastan coa frescura do son dos ukeleles.

O cantautor ferrolán Marcos Mella sóbese ao escenario acompañado polo pianista Fran Rey para interpretar os temas do seu novo disco 300 Meses. Despois de pasar por formacións como Texarkana ou El Último Gato, banda que o levou a compartir escenario con grandes do pop español como Los Secretos, La Unión ou Amaral, inicia a súa carreira en solitario, gravando varios traballos nos que contou coa colaboración de artistas como Cristina Pato, Presuntos Implicados, María Toledo, ou José María Guzmán e coincidiu sobre o palco con autores como Antonio Vega, Tontxu ou Mikel Eretxun.

En 1998 Alvaro e Kiko, nese momento cantante e guitarrista de Las Mandrágoras, deciden montar un repertorio de cancións dos seus ídolos dos anos 50: Elvis, Gene Vincent, Johnny Burnette, Eddie Cochran, Warren Smith, Link Wray, Jerry Lee Lewis, Conway Twitty e todas as estrelas do ceo Rock'n'Roll e Rockabilly. Acompañado por Andy (Big Bottom Band) ao contrabaixo e Saleta (Elephant Band, Meu) á batería estréanse ese verán. O éxito é rotundo: o maior repertorio da historia da música moderna e un repaso a ela influído polo punk de Robert Gordon ou os Stray Cats son ingredientes infalibles.

Tras máis de 20 anos de actividade Moon Cresta presenta a súa quinta entrega discográfica: un disco diferente cun concepto literario, visual e musical innovador listo para presentar ao vivo nas salas de Galicia. Hora e media de Power & Funk. Hora e media de baile, suor e xúbilo.

Ver a Ataque Escampe en directo é unha experiencia difícil de esquecer. O seu espectáculo é a restra de emocións —da sensualidade á euforia, da melancolía ao furor— que cabe esperar do grupo que leva desde 2008 escribindo a banda sonora do noso espazo tempo en máis de 120 cancións: desde alfaias ocultas até auténticos himnos underground, como Segunda división, A vitoria, Noites de agosto ou Lamborghini, entre moitos outros. Non hai dous concertos de Ataque Escampe idénticos porque todos os sitios son especiais e todos os días memorables.

Leria é un proxecto coruñés que xorde no 2021 nas rúas da Coruña, pasando por diversas salas e bares da comarca. Unha aposta pola música indie na nosa lingua que ten, entre outros referentes, a bandas como Love of lesbian, Ginebras, Vetusta Morla ou Miss Cafeína. Gañadoras do concurso “Novos Valores”, abriron as festas do Apóstolo (Santiago de Compostela) no Festigal, compartindo escenario con artistas referentes en Galicia como Fillas de Cassandra, Grande Amore ou Dios Ke Te Crew.

Músculo! nace no ano 2012 coa intención de mesturar instrumentos analóxicos con elementos electrónicos buscando novas texturas e estilos. A banda está formada por Álvaro Blanco, Raúl Santiago e Manuel Rodríguez. A súa evolución musical foi escorándose cara a electrónica sen deixar de lado a experimentación, adaptándose ás máis novas tendencias sen complexos e sen medo a explorar novos sons.