Evento: IV Maker Faire Galicia

A Maker Faire volverá ao Museo Centro Gaiás do 23 ao 25 de novembro. Nas súas tres edicións anteriores, o encontro congregou arredor de 30.000 asistentes e medio milleiro de makers que expuxeron os seus proxectos.

Maker Faire Galicia concíbese como un evento para todos os públicos e disciplinas, como a robótica, mecánica, ciencia, arte urbana, gastronomía, música, electrónica ou artesanía. Un espazo para compartir coñecemento, descubrir proxectos e facer contactos profesionais. 

Ao igual que en 2017, a feira contará con relatores e expositores de referencia a nivel internacional, entre os que destacan como primeiro confirmado o deseñador francés Gael Langevin, de InMoov, creador do primeiro robot humanoide de código aberto. A cita volve incluír un día enfocado ao sector profesional –o venres 23 de novembro–, favorecendo que os expositores poidan dirixir dun modo máis óptimo a súa oferta de produtos e servizos, diversificándose en función do seu público obxectivo. A fin de semana manterase para o público xeral, cunha programación que contará con obradoiros, charlas, actuacións ou campionatos entre outras moitas actividades.