Unha traxicomedia sobre a opresión familiar con tinturas de humor negro e absurdo. 

Unha peza na que agroman os delirios e desexos reprimidos establecendo unha conexión co universo lorquiano de A Casa de Bernarda Alba.

Cinco actrices en escena habitan un espazo en branco e negro a cabalo de dúas épocas, subxugadas pola onmipresencia do frío que emana do gran frigorífico branco. Asistimos á desconxelación gradual dos corpos desde o hieratismo á 'organicidade', nunha inquietante atmosfera na que destacan as queixas do violín.

6 cubos negros en corpo branco forma parte de HEPTAGONÍA, un proxecto a longo prazo que se compón de sete espectáculos que pretenden dar luz ao conflito vital da muller na sociedade actual. Trátase de darlle a volta a idea da creación do mundo xudeocristiana e convertela na palabra das deusas, das mulleres traballadoras: “A muller creou o seu propio mundo e ao sétimo día traballou”.