Evento: Romaría da nosa Señora da Barca

venres, 13 setembro, 2019 a luns, 16 setembro, 2019
Muxía
, Muxía

Romaría da nosa Señora da Barca

É tradicional cumprir cos ritos da pedra dos Cadrís e da pedra de Abalar, ás que se atribúen propiedades curativas

O santuario da Virxe de Nosa Señora da Barca é un dos lugares de peregrinación máis antigos de Galicia. Conta a lenda que a Virxe chegou aquí para dar ánimos ao Apóstolo Santiago no seu labor evanxelizador, nunha barca de pedra, cuxos restos se atopan entre as grandes moles graníticas que baña o mar xunto ao santuario. Unha delas é a pedra dos Cadrís, que simboliza a barca, por debaixo da cal pasan nove veces os romeiros nun ritual ancestral para curar os males reumáticos; outra, a que simboliza a vela, é a pedra de Abalar, unha mole que se balancea baixo os pés cun pouco de paciencia, aínda que a lenda di que só poden facela oscilar as persoas libres de pecado, e, a terceira, a pedra do Temón, que simboliza o temón da barca. A todas elas atribúenselles propiedades curativas.

A romaría de Nosa Señora da Barca é unha das máis concorridas de Galicia e, como é habitual nelas, é un compendio de relixiosidade, ritos pagáns, comida campestre e troula. Desde o sábado, o camiño que leva ao santuario é unha continua procesión de xente –moitas persoas chegan andando desde as súas localidades de orixe– e vanse colocando os postos da festa. Entre música de gaitas e pandeiretas, os romeiros gozan da súa comida campestre. A troula segue pola noite na localidade, e o domingo pola mañá os devotos acoden á misa ao ar libre no exterior do santuario e á procesión ata a vila onde teñen lugar a bendición das augas e unha enxordecedora traca de foguetes e morteiros.

Máis eventos de tipo Festa/Feira popular

Festa da mazá
6 de outubro
Negros
Festividade da Virxe de Guadalupe
13 de setembro a 20 de setembro
varios espazos
Romaría da Saínza
20 de setembro a 22 de setembro
Rairiz de Veiga
Festa de San Miguel e Danza das Espadas
29 de setembro
Avenida de Ourense