Evento: A BARCA DE CARONTE. A travesía vital de Isaac Díaz Pardo

Coincidindo coa dedicación do Día das Artes Galegas de este ano 2025 por parte da Real Academia Galega de Belas Artes á figura do artista Isaac Díaz Pardo, o Museo de Belas Artes da Coruña organiza a exposición A BARCA DE CARONTE. A travesía vital de Isaac Díaz Pardo, comisariada polo seu fillo Xosé Díaz Arias e en colaboración co equipo técnico facultativo do Museo de Belas Artes da Coruña.

O título xorde das dúas grandes obras que Isaac realizou en distintas épocas da súa traxectoria artística sobre o relato mitolóxico da nave do barqueiro do inframundo. O tema –que insinúa a viaxe do pobo galego cara ao seu destino– evoca aquí o seu propio percorrido creativo, que vai desde as artes plásticas ao deseño industrial.

En cinco seccións amósase esa traxectoria, desde a súa primeira etapa pictórica ata a derradeira – de deseñador industrial – pasando pola etapa de transición plástica e a de estudo e posta en práctica dos sinais que transmite a tradición e a memoria, coa creación do Laboratorio de Formas de Galicia e os seus proxectos.