Evento: Pavía 1525. 500 anos do nacemento dos terzos españois

O domingo 18 de maio, coincidindo co Día Internacional dos Museos 2025 abrirase ao público no Museo Histórico Militar da Coruña (praza Carlos I nº 1), a exposición Clicks Playmobil «Pavía 1525. 500 anos do nacemento dos terzos españois».

A exposición está organizada pola Asociación de Coleccionistas de Clicks Playmobil Galicia. Unha asociación de coleccionistas de xoguetes Playmobil que nace das inquietudes dun grupo de afeccionados e amantes dos clicks que no seu afán por divulgar este xoguete, sen ánimo de lucro, xera outra forma de ver o entretemento, a complicidade entre pais e fillos, e amplía a concepción participativa na cultura coa montaxe de exposicións itinerantes, neste caso no Museo Histórico Militar da Coruña cunha exposición sobre Os Terzos.

Además, co fin de alimentar un labor social nos hospitais da Sanidade pública galega, cada dous meses organizan pequenas exposicións temporais nas áreas de pediatría dos hospitais da Coruña, Lugo, Santiago e Vigo. Con estas pequenas mostras as nenas e nenos que pasan polo hospital teñen un lugar de recreo e distracción. Ademais, fan entrega de xoguetes aos nenos e nenas hospitalizadas para fomentar o xogo colectivo e a creatividade que permite un xoguete tan versátil como o Playmobil. Na actualidade PlaymoGalicia está integrada por uns 40 socios.

A Exposición permanecerá aberta ao público, de forma gratuíta, no horario habitual do Museo, de luns a sábado de 10:00 a 14:00 horas e de 17:00 a 19:30 horas; e domingos e festivos de 10:00 a 14:00 horas.