Evento: Udra en concerto

UDRA xurde cando Álvaro Trillo (batería), Maritxinha (baixo) e Diego Negro (guitarra e voz), xuntan as súas forzas para facer tremer a terra co seu groove que bebe do neosoul e das músicas progresivas con grandes influencias do funk, o jazz e as propostas urbanas. UDRA é un grupo que se asenta na onda da vangarda global máis micorrícica, bebendo de tradicións de todo o mundo para crear un concepto globalizado no mellor sentido da palabra sen cultivar propiamente a estrañamente denominada world music, senón desenvolvendo un estilo propio que debuxa un amplo e colorido mapa de sonoridades e influencias.

No ano 2018 Diego Negro pon a disposición do trío as súas composicións antigas e novas e comeza a xirar baixo o nome xenérico de Diego Negro Trio, pero a medida que a formación vai adquirindo un son e carácter distinto do que fora con anterioridade, un novo ser arranca a camiñar con vontade propia, tomando forma definitiva no 2020 como UDRA.