Evento: A Alma

Este sétimo traballo en estudo da banda supón a estrea da súa nova formación, co retorno do cantante Alex Charlón e as incorporacións de Julio Vilariño e Cibrán Tenreiro

A produción do álbum, cun son atmosférico que homenaxea dende o pop xéneros como o soul minimalista, o krautrock ou o rock de estadio, correu a cargo de Hevi (Malandrómeda, Fluzo)

Ataque Escampe vén de publicar nas principais plataformas de streaming o EP A alma, que contará tamén cunha edición limitada en vinilo de dez polgadas dispoñible nas próximas semanas. Con este traballo, gravado entre maio e outubro de 2019 no Laboratorio Soyuz e producido por Hevi (Malandrómeda, Fluzo), a banda parte do pop para achegarse a xéneros como o krautrock, o ambient, o R&B ou mesmo o rock de estadio. Faino ás veces dende o lírico (con Clarence Clemons, saxofonista da E Street Band, asomando na letra de “O que pode un corpo”) e ás veces dende o musical (coas caixas de ritmos e programacións de “Espada Excalibur” levando ao grupo cara un soul minimalista ou a aproximación ao progresivo de “As Cruces”, a canción máis longa na historia do grupo).