Evento: Pestana, a verdade entre as mans

Pestana, a verdade entre as mans rescata e pon en valor a un autor descoñecido, a pesar da súa altísima calidade, e que representa un dos nomes máis relevantes da fotografía hispanoamericana do século XX. Baldomero Pestana foi o gran retratista da Xeración dos 50 –na súa etapa en Perú– e o autor dunha fotografía de denuncia con personaxes da rúa, á altura dos grandes mestres do movemento. 

Baldomero Pestana é un galego froito da emigración, que regresa á súa terra ao final dos seus días e deixa o seu legado –17.000 negativos, moitos deles inéditos– en Galicia, que na práctica unicamente o viu nacer. Un legado que reflicte á perfección a súa vida e o seu traballo, do que se debe enxalzar o compoñente social das súas fotografías que o achegan á vertente máis humanista –o seu traballo en Perú– e á vertente máis intelectual dunha das épocas máis simbólicas e de relevancia literaria e cultural como son: o París da década dos 60 do pasado século co coñecido ‘boom latinoamericano’; a eclosión do jazz; ou o nacemento da chamada contracultura. Na súa obra conviven a calidade coa popularidade no seu senso máis rico e estimulante.

A mostra é froito da colaboración da Fundación Cidade da Cultura co Instituto Cervantes. É a máis completa exposición de Pestana realizada até o momento, cun total 150 fotografías e documentos referentes á traxectoria profesional do artista (revistas Life, Times ou Squire, etc.), así como obxectos persoais.