Evento: BachCompostela·O xenio concertante – Virtuosismo e diálogo

A Catedral de Santiago de Compostela, centro espiritual de Europa e meta de peregrinación desde hai séculos, acolle BachCompostela, un proxecto único que presenta a interpretación íntegra da obra para órgano de Johann Sebastian Bach en 21 concertos. Un ciclo excepcional que coincide co Ano Santo Compostelán 2027 e o 50.º aniversario do órgano Mascioni do templo.
Os concertos, a cargo do organista Juan de la Rubia, celébranse os segundos xoves de cada mes entre outubro de 2026 e decembro de 2028. Os programas articúlanse arredor dos ciclos litúrxicos do ano e dos grandes contextos estéticos da obra bachiana: Italia, Francia, a Eucaristía, o coral e a transcrición.
Organista titular da Basílica da Sagrada Familia de Barcelona e profesor na Escola Superior de Música de Catalunya, Juan de la Rubia desenvolve unha traxectoria internacional como intérprete, improvisador e director, cunha especial dedicación ao repertorio de Johann Sebastian Bach. A súa formación en Valencia, Barcelona, Berlín, Toulouse e Roma, xunto a mestres como Montserrat Torrent, Wolfgang Seifen e Michel Bouvard, completouse con figuras como Olivier Latry e Ton Koopman.
Bach atopou no concerto italiano unha fonte inesgotable de inspiración. Este programa explora o diálogo entre o virtuosismo instrumental e a escrita para órgano a través de transcricións, sonatas e grandes páxinas de brillantez técnica. A capacidade de Bach para transformar modelos alleos en obras profundamente persoais revélase aquí con toda a súa forza creativa.
Programa
Concerto en sol maior, BWV 592 A partir do Concerto en sol maior de Johann Ernst, príncipe de Saxonia-Weimar

1. [sen indicación]
2. Grave
3. Presto

• Wo soll ich fliehen hin, BWV 694

Da terceira parte do Clavier-Übung

• Fughetta super Dies sind die heiligen zehn Gebot, BWV 679

Sonata en do menor, BWV 526

1. Vivace
2. Largo
3. Allegro

Fantasía en sol maior, BWV 571

• Jesu, meine Freude, BWV 713 (Fantasía)
• Christus, der uns selig macht, BWV 747

Toccata e fuga en re menor, BWV 538 (Dórica)