Evento: Gaia salvaxe

Cedemos o espazo para acoller esta colección que nace dunha idea sinxela: en Galicia, o monte está tan vivo que parece que todo se mestura, que as fronteiras se difuminan.

A autora quixo imaxinar que os nosos animais non só viven entre árbores e flores, senón que forman parte deles. A través destas ilustracións, convídanos a mirar un pouco máis de preto e descubrir eses fíos invisibles que unen a fauna e a flora galegas. Esta é a súa forma de dar as grazas á terra onde naceu e medrou, á súa natureza que tanto nos aporta, e de lembrarnos que é o noso deber coidala e protexela.

Rocío Reboredo Pardo é unha apaixoada do debuxo e a pintura desde a infancia, desenvolveu a súa faceta artística de xeito autodidacta ata que os estudos e a vida profesional afastárona temporalmente do que tanto amaba.

O impulso creativo rebrotou no ano 2020, momento no que retomou a súa paixón e mergullouse no universo da acuarela da man do recoñecido artista galego Xurxo Martiño. O seu territorio natural é a ilustración, un espazo onde a súa mente divaga para dar vida a mundos de fantasía poboados por dragóns e criaturas extraordinarias. Para ela, este universo é un refuxio necesario, unha tregua fronte ao ruído e a complexidade do mundo real.

Pode visitarse do 6 de xullo ao 31 de agosto no vestíbulo en horario de apertura da biblioteca.