Evento: Begoña Caamaño. Tecendo palabras para cambiar o mundo

A Biblioteca de Galicia súmase, un ano máis, á celebración do Día das Letras Galegas cunha nova mostra bibliográfica dedicada á figura homenaxeada en 2026.
A exposición reivindica as dúas grandes facetas de Begoña Caamaño: a xornalista e a narradora, entendidas como parte dunha mesma forma de observar e interpretar o mundo. No ámbito do xornalismo, tanto na prensa escrita como na radio, empregou a palabra para denunciar desigualdades, discriminacións e inxustizas. Na ficción, reinterpretou mitos e relatos tradicionais para construír novos referentes femininos e cuestionar os estereotipos transmitidos ao longo do tempo.
A mostra reúne arredor de 50 pezas, na súa maioría procedentes dos fondos da propia Biblioteca de Galicia, ás que se suman tres documentos cedidos temporalmente pola Biblioteca do Consello da Cultura Galega. Entre os materiais expostos inclúense publicacións sobre a súa vida e traxectoria, colaboracións no ámbito musical, unha ampla selección de prensa na que participou, así como as súas novelas e outros textos literarios. Tamén se recollen diferentes homenaxes realizadas desde o seu falecemento ata a actualidade.
As ilustracións da exposición son obra de Ana Santiso, que acompaña con debuxos os materiais bibliográficos da mostra.
Con esta iniciativa, a Biblioteca de Galicia pon en valor o legado das voces fundamentais da literatura galega e invita o público a achegarse á obra e ao pensamento dunha autora imprescindible das nosas letras.