Evento: Masides

A Fundación Eugenio Granell inaugura o mércores 6 de maio ás 20:00 h a exposición MASIDES, un proxecto comisariado por María Esther Rodríguez Losada que poderá visitarse ata o 18 de xuño. A exposición propón unha lectura da memoria histórica e do século XX, reivindicando as luces e sombras dun territorio e dunha cultura atlántica e europea con identidade propia.
A exposición rende homenaxe ao legado de figuras fundamentais como Castelao e Carlos Maside, que atravesaron momentos clave do século XX como a monarquía, a ditadura, a república, a guerra civil e o exilio. A través deles constrúese un relato sobre mestres e discípulos que continúa coa figura de Xulio Maside, representante doutra xeración histórica marcada pola posguerra e a transición democrática.
A exposición destaca tres temperamentos artísticos e vitais unidos por unha mesma idea de compromiso cívico e cultural: Castelao, ligado ao Grupo Nós e á dimensión política; Carlos Maside, centrado na creación artística; e Xulio Maside, que representa a procura da liberdade como plenitude vital.