Evento: Unha ollada colectiva contra o esquecemento

A mostra reúne os traballos realizados no marco dun obradoiro de fotografía participativa con persoas da comarca do Ribeiro, coordinado pola comisaria Sara Garchi. A exposición está composta por fotografías contemporáneas, imaxes de arquivo familiar, obxectos e pezas interactivas que dialogan entre si e co territorio.

Os proxectos expositivos percorren temas como as adegas abandonadas e o papel das mulleres, a figura das curandeiras, a memoria migrante, o cine como espazo de resistencia cultural, a barbería como lugar de encontros, o impacto da construción do embalse de Castrelo e a relación emocional e simbólica co río e coa paisaxe. A través destas historias, a mostra constrúe unha cartografía viva do Ribeiro, feita de afectos, lembranzas e loitas cotiás.