Evento: Libros venerados en venerables bibliotecas

Celebramos o Día da Edición, que conmemora o aniversario do nacemento de Ánxel Casal, co roteiro Libros venerados en venerables bibliotecas.

Santiago de Compostela alberga o principal número de bibliotecas históricas de Galicia. Nos fondos que atesouran, podemos seguir con precisión a evolución da cultura europea a través de singulares edicións, observando como as técnicas de impresión, a evolución das ideas, as azarosas vidas dos seus impresores, autores e propietarios e os cambios nos réximes políticos deixaron unha valiosa pegada. Propoñemos desta volta unha visita a catro singulares bibliotecas da cidade, para descubrir algúns dos seus tesouros bibliográficos e as historias que agochan, desde incunables, edicións raras ata libros de biografía turbulenta. Na Biblioteca Pública Ánxel Casal coñeceremos algúns fermosos libros do seu fondo e da Biblioteca de Galicia, para despois atopar exemplares únicos nas bibliotecas do Convento de San Francisco, o Consello da Cultura Galega e a Universidade de Santiago de Compostela. 

Comezaremos o roteiro no salón de actos da nosa biblioteca. Dirixido a público adulto. As persoas interesadas poden recoller a invitación no mostrador de información da biblioteca dende 30 min antes do comezo da actividade. 20 prazas dispoñibles

Podes consultar as normas de reparto das entradas para as actividades cun número de asistentes limitado nesta ligazón.

Esta actividade conta coa colaboración da Biblioteca de Galicia, a Biblioteca da Universidade de Santiago de Compostela, a Biblioteca Franciscana de la Provincia de Santiago e o Consello da Cultura Galega.