Unha picaraña, unha radial, incluso unha pistola. Estas memorias do inframundo comezan cun son seco, violento, como corresponde a todo acto de subtracción. Un só disparo esboroa en cuestión de segundos calquera sinfonía xeolóxica, os miles de anos necesarios para que as estalactitas e as estalagmitas se formen, centímetro a centímetro, nun sutil proceso de goteo.
Gastón prometeuse a si mesmo abandonar a profesión se non consegue un gran papel como actor antes dos 30 anos. Só lle queda unha semana para logralo. Comeza a conta atrás!
360 curvas marcan a distancia que separa A Fonsagrada de Lugo. Este camiño longo, difícil e descendente entre montañas reflicte o declive dun lugar que, a comezos dos anos 90, decidiu loitar pola súa supervivencia.
Emile Gireau, escultor francés residente en A Coruña (Galicia), reflexiona sobre o seu proceso creativo. Tumbado no seu obradoiro, “como no diván do psicanalista”, viaxa da infancia á adultez e volta, pasando polo afundimento do petroleiro Mar Exeo aos pés do faro da cidade. Rodeado de ferramentas e de anacos do buque, unha serie de saltos mentais lévano a alcanzar unha verdade: Emile non é un escultor.
1989. Os pais de Paula sepáranse sendo ela unha nena. 2019. Ela sepárase de Joy logo dunha década de relación. Que teñen en común as dúas historias e como son diferentes?
Veleiro usa o seu arquivo doméstico –e o do seu proxenitor, adicto á cámara de vídeo, filmándoa a todas as horas– para ofrecer unha reflexión sobre a natureza deste tipo de imaxes en tanto que banco de recordos. Pero cando se están a filmar, como impactan no xeito de nos relacionar cos nosos seres queridos?
Tras a curta de ficción As tres caídas de María Santiso (2019), con Lucía Veiga á fronte, sobre unha muller que vive illada nunha aldea remota; e o tráiler dun filme de mortos viventes que nunca existiu, As tres vidas de María Santiso (2022), na que a mesma protagonista “resucitaba”; As tres outras vidas de María Santiso (2024) toma a forma dun falso making of da mesma fita. Comedia negra de irreverente humor para atacar un dos grandes males de Galicia: o esmorecemento do mundo rural.
Resonancias converteuse nunha fermosa exploración polo universo compartido e descoñecido da Lusofonía en Sadurniño realizada por unha cineasta da fronteira. Diana foi quen de atopar nunha aldea allea o ronsel da súa identidade cultural e, ao tempo, ser fiel a si mesma e á propia memoria persoal. O talento da cineasta luso-galaica foi quen de diluír, mediante resonancias vividas, os 220 km que nos separan da súa patria da infancia. (Manolo González)
Inmediatamente despois do fracaso da Armada Invencible, a Raíña Isabel I de Inglaterra preparou unha frota de represalia para atacar ao Imperio español. A Contraarmada estaba formada por 180 barcos e case 30.000 homes e tiña o obxectivo de asestar un demoledor golpe a España, derrotando ao maior imperio do mundo naquel momento, asegurándose o control das lucrativas rutas comerciais con América e entronizando a un rei afín en Portugal.
O cabalo galego de monte está a desaparecer, só unhas poucas bestas resisten acosadas polos bandidos, os lobos... e agora tamén polos parques eólicos. Ao seu carón, a pequena aldea de Sabucedo preserva algo único: un vínculo ancestral e íntimo cos cabalos salvaxes. Unha vez ao ano a aldea celebra a “Rapa das Bestas" e 15.000 persoas acoden a presenciar o atávico, os veciños cortando as crinas dos cabalos nun enfrontamento corpo a corpo. Cando todos marchan, ninguén ve a realidade detrás da rapa: cada ano hai menos bestas no monte e –coma nun espello– menos xente na aldea.
«Cheiras iso?» A cámara entra nos montes de Galicia e do norte de Portugal entre murmurios. Para tecer os sinais que deixa a vida salvaxe hai que agudizar os sentidos. Estas imaxes afástanse da representación de pureza virxinal asociada ás paisaxes naturais do noroeste da Península Ibérica. Son conscientes do intenso modelado da acción humana. Ser unha criatura salvaxe aquí é ser salvaxe asediado. SALVAXE, SALVAXE rastrexa imaxes e ausencias do lobo ibérico xunto a un equipo de investigación universitario.
