Nova: A Xunta convida a despedir ‘Atardecer no Gaiás’ con Caldo e Néboa, dúas bandas que representan a aposta pola experimentación da nova escena musical galega
22/08/2022
A Xunta convida a despedir ‘Atardecer no Gaiás’ con Caldo e Néboa, dúas bandas que representan a aposta pola experimentación da nova escena musical galega
A Cidade da Cultura pecha o ciclo con dúas das formacións galegas con maior proxección e expoñentes da capacidade de renovación da música en Galicia
Caldo subirá ao escenario da Praza Central o xoves a partir das 21 horas coa súa reinterpretación da música tradicional
O venres pechará o cartel de concertos o quinteto Néboa cunha mestura de canción tradicional e electrónica
Con estas dúas últimas propostas son dezaseis os grupos e artistas que deixan pegada no Gaiás con diversos estilos musicais desde o pop á canción de autor, o flamenco, a electrocumbia ou o folk experimental
Santiago de Compostela, 22 de agosto de 2022.- A Cidade da Cultura pecha a programación de Atardecer no Gaiás con dous concertos, o xoves e venres, protagonizados por dúas bandas galegas, Caldo e Néboa, que reinterpretan a música tradicional con distintos estilos e sons, sendo dous dos máximos expoñentes da experimentación musical en Galicia.
O ciclo, organizado pola Xunta de Galicia coa colaboración do INAEM, veu converterse de novo nesta décimo segunda edición nun gran escaparate para as tendencias musicais actuais, tanto galegas, na súa meirande parte, como do resto do territorio español e portugués.
Para esta última semana de actuacións o escenario da Praza Central do Gaiás contará o xoves, a partir das 21 horas, con Caldo. Os seus tres compoñentes, afincados no Valmiñor, achegan a música tradicional a contextos sonoros contemporáneos a través da experimentación cos instrumentos (violín, pandeireta e guitarra), mostrando influencias das músicas europeas e atlánticas. O grupo recibiu o recoñecemento ao mellor proxecto de música folk nos Premios Martin Códax da Música 2020.
Polo mesmo ronsel que combina a canción tradicional con ritmos contemporáneos despedirá o cartel de concertos o venres á mesma hora o quinteto galego Néboa. O seu estilo pop-folk é resultado dunha mestura de toques de electrónica, jazz e trip-hop. Con Fósforo, EP con cinco temas, dan continuidade ao seu primeiro traballo longo, A realidade enganosa.
Diversos estilos nun percorrido de dezaseis actuacións
Con estas dúas últimas propostas, Atardecer no Gaiás pecha unha edición de dezaseis concertos na que o público puido gozar de diferentes estilos musicais á luz do solpor na Cidade da Cultura, desde o pop á canción de autor e o flamenco, a electrónica, o folk experimental e ritmos urbanos que mesturan xéneros como a electrocumbia, trap ou hip hop.
O programa comezou en xullo con Los Jinetes del Trópico e Sila Lúa e continuou co andaluz Alfredo Tejada, a extremeña Ruiseñora ou a madrileña Lusillón. Polo escenario ao aire libre pasaron todos os xoves e venres do verán diferentes artistas e formacións como Mundo Prestigio, MJ Pérez ou Terrae, Carla Green & the Demons, Basanta, Kimberley Tell, ou os grupos seleccionados do programa Xuventude Crea da Xunta e do certame português XeneraSon Rock.