Nova: 'Escenas do cambio' entra na programación do Xacobeo'21

Santiago de Compostela, 18 de novembro de 2019.- A Xunta de Galicia programará na sexta edición do Festival de inverno de teatro, danza e arte en acción da Cidade da Cultura, Escenas do cambio, a estrea de seis pezas tanto de artistas internacionais como de compañías galegas. Deste xeito, reforza a súa proxección internacional, á vez que volve confirmar que é un excelente escaparate dos proxectos do sector da comunidade. Ademais, este 2020 terá como novidade a súa incorporación á programación Xacobeo’21.

Deste xeito, o festival internacional do Gaiás contará entre as súas 10 pezas -que programará entre o 31 de xaneiro e o 8 de febreiro de 2020- coa primicia en España de obras de figuras de referencia internacional, que están ao fronte das accións máis anovadoras e vangardistas da escena actual. Así, a coreógrafa polaca-canadense Ula Sickle ondeará durante catro horas en Relay unha bandeira xigante negra por toda a Cidade da Cultura para sumarse simbolicamente ás manifestacións en Polonia en defensa dos dereitos das mulleres; e Dorothée Munyaneza reconstruirá en Samedi Détente o xenocidio da súa Ruanda natal desde a perspectiva real coma testemuña deste cruento conflito.

Nesta presenza de artistas con proxección internacional, débese salientar a peza de Jerk, de Gisèle Vienne. A partir dunha novela de Dennis Cooper, co que habitualmente soe colaborar, a francesa reconstruirá o caso real de Dean Corll, quen asasinou a máis de 20 nenos en Texas coa axuda de dous adolescentes. A representación destas historias será a través dun actor-ventrílocuo e monicreques.

Con este tipo de obras como a de Munyaneza ou Vienne, Escenas do cambio mantén a súa aposta por pezas dunha alta calidade artística a e netamente culturais que procuran promover, repensar e replantexar ópticas e perspectivas ao espectador e a súa conciencia.

Obra con xuíz, avogado e fiscal reais

O director xeral de Políticas Culturais da Xunta, Anxo M. Lorenzo, foi o encargado de presentar hoxe a programación deste festival na aula da Escola de Práctica Xurídica, onde o alumnado da Facultade de Dereito da USC fai simulacros de xuízos, xa que unha das obras importantes desta edición é Please, continue (Hamlet), na que se contará cun elenco xudicial real -un xuíz, avogado e fiscal en activo- para ficcionar en escena un xuízo ao coñecido personaxe de Shakespeare.

O dramaturgo e codirector catalán Roger Bernat trae por vez primeira a Galicia esta aplaudida obra, na que facendo desaparecer a chamada cuarta parede, tamén converterá o público asistente en xurado popular nunha escenificación do cidadán Hamlet, acusado de matar o seu tío Polonio.

Programación Xacobeo 21

As propostas desta edición de Escenas do cambio foron posta en valor polo director xeral de Políticas Culturais, quen considerou que sitúan o festival como unha das “citas culturais imprescindibles” para coñecer as propostas escénicas “máis innovadoras” e de “máis prestixio” no eido internacional, o que cualificou de “oportunidade única” para o público que asista ao festival.

Ademais, anunciou a incorporación deste certame á programación do Xacobeo 21 e puxo en relación a similitude da confluencia e convivencia en Escenas do cambio de artistas e compañías de diferentes partes do mundo -España, Portugal, Polonia, Francia, Austria, Hungría e Ruanda, nesta edición- coa que se produce nas Rutas Xacobeas cos peregrinos.

Creadoras e temáticas desde unha óptica feminina

Na súa intervención, Anxo Lorenzo tamén salientou a alta presenza de creadoras mulleres nesta edición, “un total de seis, que supoñen o 50 por cento do repertorio do festival”, remarcou. Á vez, lembrou que con esta participación o festival volve amosar a súa aposta pola creación e por temáticas desde perspectivas femininas.

Na presentación, o responsable de Políticas Culturais da Xunta estivo acompañado polo director artístico do festival, Pablo Fidalgo Lareo; a nova decana da Facultade de Dereito, Ana Gude, e os artistas galegos Quico Cadaval e Celso Sanmartín.

Tres estreas absolutas galegas

Precisamente, o director de Escenas do cambio tirou proveito da presenza dos artistas galegos na rolda para incidir na aposta do festival pola creación escénica da nosa Comunidade. Neste senso, apuntou a que as tres estreas absolutas son de compañías galegas, tanto de creadores consolidados como son Quico Cadaval, Guti e Celso Fernández Sanmartín, que en Tres vellas (polo menos) ofrecerán unha orixinal sesión de contacontos mentres o público cea; como de emerxentes como Los Bravú coa súa performance Caderno de vacacións e Pálido Domingo con Pentecostés.

O narrador e contacontos Celso Fernández Sanmartín -que presenta por terceira vez unha obra súa en Escenas do cambio- tamén interveu na rolda para agradecer o papel do festival como “altofalante” do “moito e de boa calidade” do que “quere e ten que dicir, contar e expresar” o gremio escénico galego e puxo en valor o feito de que as tres estreas absolutas desta edición sexan precisamente de compañías galegas.

Venda de entradas a partir do 30 de novembro

Ao igual que en todas as súas edicións, Escenas do cambio 2020 conta cunha rede de colaboradores como o INAEM, o Instituto Camões de Portugal en Vigo e tamén da Agadic, do Centro Dramático Galego xunto ao Concello de Santiago e a Universidade de Santiago, xa que continúa a liña aberta de estender a súa programación e máis alá do Gaiás, con representacións en diferentes espazos culturais da capital de Galicia, que inclúen o Teatro Principal e o Salón Teatro.

Toda a información da programación de Escenas do Cambio 2020 está na páxina da Cidade da Cultura de Galicia -www.cidadedacultura.gal- e tamén na do festival -www.escenasdocambio.org-, onde se poderán mercar as entradas a partir do 30 de novembro de 2019.