Nova: Cultura apoia a celebración da Semana Internacional de Cine Euroárabe AMAL que celebra a súa décimo sétima edición
15/10/2019
Cultura apoia a celebración da Semana Internacional de Cine Euroárabe AMAL que celebra a súa décimo sétima edición
O director xeral de Políticas Culturais, Anxo M. Lorenzo, participou na presentación desta cita que terá lugar en Santiago do 21 ao 25 de outubro
A programación arrancará o luns no Teatro Principal coa proxección do documental ‘La guerra empieza aquí’ de Joseba Sanz
-
Cartel Festival Amal 2019
Santiago de Compostela, 15 de outubro de 2019.- O director xeral de Políticas Culturais, Anxo M. Lorenzo, participou hoxe no hotel Araguaney na presentación da programación da décimo sétima edición da Semana Internacional de Cine Euroárabe AMAL, que se celebrará en Santiago de Compostela entre o 21 e o 25 de outubro co apoio da Xunta de Galicia.
Durante a presentación, a cargo do presidente da Fundación Araguaney-Ponte de Culturas e director da Semana AMAL, Ghaleb Jaber Martínez, o representante da Xunta afirmou que este festival audiovisual permite un encontro entre as culturas árabe e europea, tendendo pontes a través da linguaxe universal do cine. Tamén puxo en valor a proxección de traballos que non teñen cabida no circuíto comercial convencional, así como a reflexión que ofrece sobre as diversas realidades sociais dos territorios árabes.
Na rolda de prensa, ademais de Anxo M. Lorenzo, tamén estivo presente o presidente da Fundación Araguaney-Ponte de Culturas e director da Semana AMAL, Ghaleb Jaber Martínez.
Nove proxeccións
Ao longo de cinco días AMAL ofrecerá nove proxeccións no Teatro Principal de Santiago, entre as que se inclúen tanto cintas de ficción como documentais. No marco deste último xénero, na sesión inaugural do ciclo estrearase La gente empieza aquí, de Joseba Sanz. Tras o filme, haberá unha charla coloquio con Jesús Núñez Villaverde, codirector do Instituto de Estudos sobre Conflitos e Acción Humanitaria (IECAH).
A lista de documentais incluídos en AMAL complétase con Sky and Ground, dos produtores Tayla Tibbon e Joshua Bennet; Hamada, de Eloy Domínguez; Soufra, do cineasta Thomas Morgan, e Renault 12, de Mohamed El Khatib. No relativo á ficción, proxectaranse os filmes Look at me, de Nejib Belkadhi; Yomeddine, do escritor e director Abu Bakr Shawky; Mafak-Screwdriver, de Bassam Jarbawi, e Capharnaüm, da directora libanesa Nadine Labaki.
Toda a información sobre os filmes e os horarios de proxección poden consultarse na páxina web da Semana Internacional de Cine Euroárabe AMAL ou a través das redes sociais.