Nova: O Festival das Núbebes leva unha vintena de actividades a Pontevedra

Pontevedra, 21 de setembro de 2018.- O director da Axencia Galega das Industrias Culturais (Agadic), Jacobo Sutil, asistiu esta tarde no Teatro Principal de Pontevedra ao espectáculo de inauguración do Festival das Núbebes, que ata o domingo 30 ofrecerá unha vintena de actividades para bebés e familias. Nesta sexta edición, o encontro incorpórase por vez primeira á listaxe de eventos subvencionados pola Xunta a través da convocatoria pública de axudas para festivais profesionais de artes escénicas.

A Agadic achega 6.369 euros á organización deste evento, promovido polo Concello de Pontevedra, como un dos nove encontros subvencionados este ano a través desta liña de apoio para mostras escénicas, dotada con 180.000 euros.

Teatro, contos, música, danza e obradoiros

Tras o espectáculo inaugural, protagonizado polo monicreque Roque –un dos personaxes creados por Baobab Teatro– xunto a outros artistas convidados, o festival ofrecerá nas dúas vindeiras fins de semana (días 22, 23, 29 e 30) unha completa programación de teatro, contos, música, danza e obradoiros para bebés e as súas familias. O obxectivo é achegar os máis pequenos da casa á arte desde idades moi temperás.

De feito, este é o primeiro festival galego dirixido especificamente a bebés, que naceu para lle dar resposta á cada vez maior demanda de actividades para estas franxas de idade, amosando cada ano en Pontevedra unha escolma de propostas lúdicas e espectáculos teatrais producidos tanto dentro como fóra de Galicia para gozar e interactuar en familia.

A venda de entradas xa está operativa no web de Ticketea e nos horarios habituais do despacho de billetes do Teatro Principal, onde se poderán retirar tamén os convites para as actividades gratuítas.