Nova: Os festivais de Cans, Curtocircuíto, Primavera de Cine e FKM contarán co apoio de Cultura para a realización das súas edicións de 2017

21/04/2017

Os festivais de Cans, Curtocircuíto, Primavera de Cine e FKM contarán co apoio de Cultura para a realización das súas edicións de 2017

A consellería e os festivais de cinema inadmitidos ás subvencións da Agadic acadan un acordo para o seu financiamento

Recibirán cantidades proporcionais ás axudas que ían solicitar, e que procederán do remanente non adxudicado na resolución das subvencións
 

  • Festival de Cans
  • Festival Curtocircuíto
  • Primavera do cine
  • FKM

Santiago de Compostela, 21 de abril de 2017.- Os certames audiovisuais de Cans, Curtocircuíto, Primavera de Cine e FKM contarán co apoio da Xunta de Galicia para a realización das súas vindeiras edicións de 2017, despois de que a Consellería de Cultura e Educación e a Xestora de Coordinadora de Festivais de Cinema acadaran un acordo que posibilitará o seu financiamento por parte da Agadic.
 
En virtude deste acordo, os devanditos catro festivais percibirán diferentes cantidades, proporcionais ás que ían ser solicitadas de seren admitidas as súas solicitudes e que procederán dos 33.439 euros non executados na resolución das subvencións da Agadic a festivais do sector audiovisual. Os pagamentos materializaranse a través de convenios do capítulo IV do orzamento.
 
Tamén queda consensuado polas dúas bandas que o festival Cineuropa queda fóra desta medida, xa que, seguindo as bases da convocatoria, aplícase o criterio que impediría a subvención de dous certames presentados por unha mesma entidade ou institución. Neste caso, ao ser tamén Curtocircuíto promovido polo Concello de Santiago, será este último o festival compostelán quen recibirá apoio por esta vía.
 
Consenso entre ambas partes

Deste xeito, a Consellería e a xestora que goberna a Coordinadora de Festivais de Cinema, colectivo que aglutina a todos os certames cinematográficos de Galicia,comparten que chegan a unha solución conxunta que pon fin a unha situación excepcional, complexa, e non desexada por ningunha das partes. Isto é así porque a Xunta de Galicia reafirma o seu compromiso coa celebración destes festivais, aos que considera estratéxicos para o desenvolvemento e dinamización do sector audiovisual galego; en tanto que os representantes dos certames aceptan esta solución, que lles permitirá contar cun financiamento seguro para o deseño das súas programacións.
 
A Xunta de Galicia, a través da Agadic, tamén se compromete a continuar o diálogo cos festivais audiovisuais galegos e cos seus órganos de representación cara á redacción de futuras convocatorias de subvencións que lles sexan de aplicación, así como á apertura de novas liñas de colaboración.