Nova: Feijóo avoga por fortalecer, enriquecer e renovar o Camiño de Santiago aproveitando a complementariedade que ofrecen outros activos turísticos como a gastronomía

Alcalá de Henares (Madrid), 1 de xullo de 2014.- O titular da Xunta, Alberto Núñez Feijóo, avogou hoxe por fortalecer, enriquecer e renovar o Camiño de Santiago aproveitando “a porosidade” e o “fácil entronque” da Ruta Xacobea con outros activos turísticos, como a gastronomía. Durante o acto de presentación do Menú Peregrino, de Asís a Compostela, que xorde da colaboración entre a rede de Paradores e restauradores galegos con Estrella Michelín, o presidente da Xunta resaltou que existen unha serie de “vasos comunicantes” e de “elementos complementarios” coa Ruta Xacobea que, dixo, “debemos estudar e, entre todos, desenvolver e potenciar”. Feijóo lembrou que as rexións que atravesa a ruta de peregrinación “temos a responsabilidade de agrandala”, ademais de “renovala e adaptala aos novos tempos”. “A aposta de futuro debe ir máis alá da conservación e da custodia do Camiño: o noso cometido pasa por nutrilo, enriquecelo e vigorizalo”, incidiu ao respecto.

Na súa intervención, o titular da Xunta apostou por manter a vixencia do Camiño de Santiago como fenómeno universal, conservando o seu torrente de espiritualidade e o seu valor primixenio como creador dun novo europeísmo. Pero, ao tempo, insistiu na necesidade de incrementar tamén “o seu valor turístico”, dado que a Ruta Xacobea na actualidade “fainos visibles ao mundo” e configúrase como “un acicate fundamental para atraer turistas ata os nosos territorios”.

Feijóo explicou que o itinerario xacobeo é a quinta razón pola que os turistas elixen Galicia como destino, se ben é intrínseco a outros atributos, como coñecer a natureza, a paisaxe, a tranquilidade e o descanso; ou a cultura, os costumes e a gastronomía, que están entre as motivacións que máis valoran os turistas á hora de seleccionar a Comunidade, algo do que tamén poden desfrutar percorrendo a ruta de peregrinación. “Os datos acreditan o efecto tractor do Camiño no sector turístico galego”, afirmou, destacando que os peregrinos recibidos en Compostela no que vai de ano (a 30 de xuño), ascenden a 81.685, polo que xa superan en 6.996 os rexistrados no mesmo período de 2013. Isto supón un incremento de case un 10%, sendo, ademais, o 61,42% deles, estranxeiros.

Medidas para revalorizar e promover a Ruta Xacobea
Así, conscientes de que o Camiño é un dos principais reclamos turísticos para Galicia, un “gran imán” que cada ano atrae ata a Comunidade a un maior número de peregrinos, o Executivo autonómico está comprometido coa súa revalorización e promoción. Deste xeito, segundo lembrou o mandatario galego, a Xunta incluíu a ruta de peregrinación como a primeira liña estratéxica do Plan Integral de Turismo de Galicia, unha folla de ruta colectiva que presenta á Comunidade como un destino único, que se vertebra en torno ao Camiño e que está orientada a consolidar Galicia nos mercados turísticos nacionais e internacionais. Así mesmo, cada ano, concédese o título de Embaixador de Honra do Camiño de Santiago, unha distinción outorgada, por vez primeira en 2013 ao Príncipe Felipe, agora xa Rei de España; e título que nesta edición de 2014 se lle acaba de conceder ao adestrador da Selección Española de Fútbol, Vicente del Bosque.

De cara ao futuro, a Xunta prepara o Plan director dos Camiños de Santiago, “cuxos trámites acabamos de iniciar”, salientou Feijóo, co fin de sacarlle o máximo proveito ás posibilidades que ofrece a Ruta Xacobea, revitalizándoa e impulsándoa de cara ao próximo Ano Santo que se celebrará en 2021. “Temos por diante seis anos de arduo traballo ata esta gran cita, para a que queremos contar con dous instrumentos de xestión”, indicou: por un lado o Plan director, que analizará e diagnosticará as necesidades para pór en valor os Camiño e un Plan estratéxico posterior, que fixará as propostas de actuación que se han de levar a cabo.

“As Comunidades que temos o privilexio de estar tocadas polo Camiño temos a responsabilidade de preservalo e coidalo, pero tamén de fortalecelo”, abundou o presidente da Xunta, resaltando que con cooperación, vontade e tesón, “ente todos seremos capaces” de manter acendida a chama de espiritualidade que emerxe do Camiño e que fai de Galicia e de España “un faro cultural que irradia a súa luz a todo o mundo”.

O Menú Peregrino, de Asís a Compostela
Na súa intervención, Feijóo referiuse á capacidade do Camiño para establecer unha “maridaxe perfecta” con outros produtos turísticos como a gastronomía, o que se converte nun mercado “por explorar”, nunha alternativa “de desenvolvemento en si mesmo” e nunha “posibilidade de diversificación do sector na nosa terra”. “Isto é precisamente o que presentamos aquí”, sinalou, unha nova iniciativa na que Camiño e gastronomía converxen “nunha perfecta amálgama”, o Menú Peregrino.

Segundo explicou, trátase dun menú especial elaborado con motivo da celebración do VIII Centenario da peregrinación de San Francisco a Santiago, froito da colaboración entre a rede de Paradores de Turismo e restauradores galegos distinguidos con Estrella Michelín. Así, a unión destes profesionais “dos fogóns” dá como resultado unha carta “capaz de transmitir o sabor de Galicia, tamén fóra do noso territorio”, unha cociña “que sorprende” co descubrimento de novos sabores, diferentes texturas e combinacións sinxelas, que alcanzan a excelencia grazas a estar aderezadas, dixo Feijóo, cun condimento esencial: “o amor polo ben feito”.

En total, son oito os restaurantes galegos con Estrella Michelín que participan na elaboración destas receitas: o restaurante A Estación (Cambre); Árbore da Veira (A Coruña); As Garzas (Malpica de Bergantiños); Culler de Pau (O Grove); Retiro da Costiña (Santa Comba); Pepe Vieira Camiño da Serpe (Poio); Yayo Daporta (Cambados); e Casa Solla (Poio); aos que se une o xefe de cociña do Parador do Hostal dos Reis Católicos, que achega un aperitivo especial elaborado para a ocasión. Este Menú Peregrino poderase degustar en doce establecementos da rede de Paradores: o Parador de Bielsa (Aragón); o de Olite (Navarra); o de Santo Domingo de la Calzada (A Rioxa); catro en Castela e León -o de Lerma, Cervera de Pisuerga, Benavente e León-; e cinco en Galicia, o Parador de Santo Estevo, o de Baiona, o de Cambados, o de Ribadeo e o de Santiago.

Feijóo lembrou que non é a primeira vez que Xunta e Paradores colaboran. Fixérono hai aproximadamente un ano, cando se presentaron en Santiago os espazos gastronómicos Enxebres: “Se por aquel entonces convidamos aos viaxeiros a seguir o mapa trazado polos manteis, hoxe animamos a quen nos visita a seguir o Camiño que debuxan os Menús Peregrinos”, afirmou.

Camiño e Novas Tecnoloxías
Hoxe tamén se presentou unha ferramenta exclusiva para móbiles, un recomendador das mellores aplicacións turísticas para descubrir Galicia. O obxectivo do instrumento é dobre: por un lado asegura que cada unha das aplicacións acheguen valor real aos turistas e, por outro, preséntase como un canal de visualización ao facilitar o posicionamento de todos aqueles programadores de aplicacións que traballan constantemente para ofrecer contidos de calidade.

Feijóo resaltou, a este respecto, que xa no mes de setembro pasado Xunta e Ministerio asinaron un convenio de colaboración para impulsar o Camiño Intelixente, un acordo que garante a conexión a internet en todos os establecementos do itinerario francés e que desenvolve un conxunto de aplicacións de asistencia ao camiñante.