Nova: A Xunta apoia a décimo cuarta edición do Festival Atlántica de narración oral que se suma ás celebracións do ‘Ano Oteriano’

Santiago de Compostela, 15 de xuño de 2026

O director xeral de cultura, Anxo M. Lorenzo, participou hoxe na presentación do Festival Atlántica de narración oral, o certame que se celebra co apoio da Xunta do 16 de xuño ao 10 de xullo en 33 localidades galegas. Tal e como explicou o representante da Consellería de Cultura, Lingua e Xuventude, a edición deste ano súmase á celebración do Ano Oteriano, incorporando propostas que dialogan co seu fundamental legado na cultura galega, reforzando a conexión entre tradición e contemporaneidade.

Neste marco, Anxo M. Lorenzo aproveitou a ocasión para recoñecer a capacidade da organización do Festival para “estar sempre atenta á cultura que os rodea” e gabou “a ampla traxectoria dun certame que non deixa de medrar ano tras ano, tras erixirse como referente internacional arredor das artes escénicas da palabra”. Así mesmo, puxo en valor a “descentralización da cultura que caracteriza historicamente a esta cita”, que desenvolve a súa programación nas catro provincias, chegando tanto a cidades como a pequenas vilas e parroquias no rural, favorecendo o acceso á cultura e contribuíndo á cohesión territorial con diversas iniciativas para todos os públicos en liña cos obxectivos da Lei de cultura inclusiva e accesible de Galicia.

Ademais, insistiu na “proxección exterior e o valor do intercambio cultural presente na súa programación”, coa presenza de artistas procedentes de Portugal, País Vasco, Zamora, Huelva e Colombia que fan de Galicia unha “rede internacional de creación arredor da palabra”.

Inclusión e accesibilidade

Ademais da súa presenza en máis de trinta concellos galegos, o director xeral de Cultura tamén puxo en valor o compromiso deste festival coa inclusión e accesibilidade a través da incorporación de funcións con interpretación en lingua de signos e a promoción da participación activa de entidades sociais e de persoas con diversidade funcional.

O programa completo, que chegará aos concellos de Santiago de Compostela, Ferrol, Teo, A Baña, Alfoz do Castrodouro, A Pobra do Caramiñal, Caldas de Reis, Dodro, Mugardos, Outes, Ribeira, Pazos de Borbén, Sanxenxo, Vilalba, Vimianzo, Cedeira, Padrón, Lalín, Xunqueira de Ambía, Taboada, A Pobra de Brollón, Castroverde, Barreiros, Neda, Brión, Quiroga, A Fonsagrada, Ourense, Vigo, A Coruña, A Estrada, Lugo e Sober, pódese consultar na web do festival.