Nova: Anxo M. Lorenzo resalta o impulso “de propostas culturais de calidade en todo o territorio”

Mondariz Balneario (Pontevedra), 16 de abril de 2026

O director xeral de Cultura, Anxo M. Lorenzo, participou hoxe na presentación da XVIII edición do ciclo de música relixiosa Barcia de Mera, co colabora a Xunta de Galicia “en consonancia co noso obxectivo de ofrecer programacións culturais de calidade en todas partes do territorio, especialmente no rural, e para todos os públicos”, destacou.

O representante do Goberno galego resaltou, ademais, “o aproveitamento dos nosos bens para acontecementos que unen así patrimonio e cultura, como neste caso esta cita musical” que se celebra, lembrou, do 25 de abril ata o 12 de setembro na igrexa barroca de San Martiño de Barcia de Mera, no concello pontevedrés de Covelo, conxunto recoñecido como Ben de Interese Cultural pola Xunta.

Durante o acto deuse conta dun programa que conta con oito concertos. O primeiro correrá a cargo do cuarteto Ars Bohemia, o 25 de abril, ao que lle seguirá, o 9 de maio, a actuación do Dúo Arpa e Flauta, conformado por Fernando Raña e Alba Barreiro. Xa o 6 de xuño o ciclo estará protagonizado polo barítono Luis Cansino con Arabel Moráguez ao piano, mentres que o 4 de xullo será momento de escoitar á intérprete de viola de gamba, Sara Ruiz, e o 25 de xullo poderase gozar do concerto Vida retirada, dirixido por Ignacio García con textos de Frai Luis de León.  Para o 15 de agosto está programado o concerto da soprano Ana Melkhova con Paula Gao ao piano, ao que lle seguirá Cum Altum Sound the Trompet o día 29. A proposta musical pechará o 12 de setembro con Vox Stellae.