Nova: Rueda participa na inauguración do museo do Real Club Deportivo que percorre os 120 anos de historia do equipo coruñés
24/02/2026
Rueda participa na inauguración do museo do Real Club Deportivo que percorre os 120 anos de historia do equipo coruñés
Destaca que se trata do primeiro espazo de carácter deportivo que se integra no Sistema Galego de Centros Museísticos, do que xa forman parte 98 centros
A Coruña, 24 de febreiro de 2026
O presidente da Xunta, Alfonso Rueda, participou hoxe na inauguración do museo do Real Club Deportivo, cuxo obxectivo é facer un percorrido polos 120 anos de historia do equipo coruñés a través de 2.000 obxectos de distinta natureza como trofeos, equipacións, xornais ou material audiovisual.
Durante a visita ao Dépor Museo&Tour, Rueda –que estivo acompañado polo conselleiro de Presidencia, Xustiza e Deportes, Diego Calvo, e o de Cultura, Lingua e Xuventude, José López Campos– destacou que estas instalacións vanse incorporar ao Sistema Galego de Centros Museísticos, do que xa forman parte 98 espazos e que será o primeiro museo de carácter deportivo en integrarse na rede.
O titular do Goberno galego puxo en valor o patrimonio que acolle este museo, situado no estadio de Riazor, que permitirá transmitir valores pedagóxicos do deporte como a cultura do esforzo e servirá de impulso ao turismo deportivo, á vez que promove a marca Galicia entre todos os visitantes.