Nova: López Campos lembra a Rosalía “como referente da nosa cultura que debemos ter sempre presente”

Santiago de Compostela, 23 de febreiro de 2026

O conselleiro de Cultura, Lingua e Xuventude, José López Campos, lembrou hoxe a Rosalía de Castro con motivo da data do seu nacemento, enxalzando a autora “como unha desas persoas que sempre debemos ter como referente da nosa cultura, da nosa identidade e da nosa historia, aproveitando efemérides como esta, mais tamén poñendo en valor o seu legado de maneira constante, xunto con outros dos nosos persoeiros ilustres”.

Así, o representante da Xunta, que estivo acompañado polo secretario xeral da Lingua, Valentín García, e o director xeral de Cultura, Anxo M. Lorenzo, participou na ofrenda floral realizada a carón do monumento a Rosalía localizado na Praza de Vigo da capital galega, onde naceu a escritora. Trátase dun dos numerosos actos cos que hoxe se celebra o seu día, unha homenaxe que, tal e como apuntou López Campos, tamén “se estende á rede de bibliotecas públicas do Goberno galego, e ao servizo de bibliotecas móbiles, onde esta semana programamos distintas actividades para achegar a súa vida e obra a todos os públicos, na liña da Lei de cultura inclusiva e accesible de Galicia”.