Nova: A Xunta abre a convocatoria para impulsar actividades nas bibliotecas públicas ao abeiro do programa ‘Ler conta moito’

Santiago de Compostela, 23 de decembro de 2025

A Xunta abre a convocatoria para que aquelas entidades locais que sexan titulares de bibliotecas públicas ou axencias de lectura, integradas na Rede de Bibliotecas de Galicia, soliciten as subvencións destinadas á realización de actividades de dinamización nestes espazos.

Así, o Diario Oficial de Galicia publica hoxe as bases para acceder ao programa Ler conta moito, unha iniciativa da Consellería de Cultura, Lingua e Xuventude que ten como obxectivo animar á lectura a través da programación de propostas atractivas, vencelledas aos intereses dos distintos colectivos, e que faciliten o achegamento aos espazos bibliotecarios.

Con este programa preténdese fortalecer o papel das bibliotecas como espazo de relación, aberto e participativo, e como axente facilitador da aprendizaxe permanente; promover o desenvolvemento cultural como vehículo para o crecemento persoal e colectivo; valorar o libro e fomentar a lectura como elemento de transmisión de coñecemento e de reflexión, e consolidar a programación compartida da rede bibliotecaria coa renovación permanente de propostas de calidade.

As actividades estarán dirixidas a potenciar a imaxe das bibliotecas e fomentar o acceso igualitario á cultura promovendo a lectura, a escritura ou a creación artística, así como o pensamento crítico, a innovación e a creatividade. Neste senso, as categorías dos proxectos aos que poderán optar estes equipamentos públicos estarán relacionados con obradoiros, tales como os dirixidos á escritura, ilustración ou tecnoloxía, entre outras modalidades; coa narración oral, incluíndo contacontos, lecturas en voz alta ou recitais; coa divulgación do coñecemento, a nivel científico, social ou cultural; co audiovisual, abranguendo proxeccións, audicións ou ciclos de cine e música; coa creación de contidos dixitais; coas artes escénicas, como a música, o teatro ou a danza; con exposicións de moi diversas temáticas, ou con rutas e itinerarios guiados por escenarios literarios ou espazos de interese cultural.

Cómpre lembrar, neste contexto, que a semana pasada abriuse o prazo para que aquelas persoas físicas ou xurídicas dedicadas á dinamización cultural se inscriban no catálogo Ler Conta Moito 2026 para incorporar as súas propostas a este programa de maneira que poidan ser seleccionadas polas bibliotecas na súa oferta cultural.