Nova: López Campos incide na función de Culturgal como altofalante para as novidades culturais de Galicia

Pontevedra, 28 de novembro de 2025

Máis de 750 profesionais do sector danse cita desde hoxe e ata o domingo no Pazo da Cultura de Pontevedra co gallo da 18ª edición de Culturgal, cuxa extensa programación se abre tamén ao público para ofrecerlle arredor de 225 propostas, entre espectáculos, proxeccións, adiantos de proxectos, obradoiros ou mesas redondas. Na inauguración do encontro, o conselleiro de Cultura, Lingua e Xuventude, José López Campos, incidiu precisamente na amplitude desta oferta, que bate récords de actividade, ao tempo que subliñou o papel da feira como avance cara á sociedade e ao propio sector dos novos proxectos galegos e en galego que protagonizarán a temporada cultural en 2026.

Para o titular de Cultura do Goberno galego, este “espazo de encontro é cada ano unha das máis agardadas citas da cultura galega” e o momento ideal para “facer balance do seu estado actual”. Neste sentido, fixo referencia aos múltiples e destacados premios, tanto a nivel nacional como internacional, que confirman a gran vitalidade e o bo momento de Galicia en ámbitos como o audiovisual, a escena, as artes plásticas, a literatura ou a música, entre outros.

Riqueza colectiva

“A identidade cultural de Galicia é unha riqueza colectiva que medra co esforzo e o talento de quen traballa no ámbito creativo”, sinalou o conselleiro, para quen iniciativas como Culturgal “contribúen decisivamente a que o noso tecido cultural gañe en visibilidade e estabilidade para avanzar con firmeza”.

En representación da Consellería de Cultura, Lingua e Xuventude acudiron tamén a este acto inaugural o secretario xeral da Lingua,  Valentín García; o director xeral de Cultura, Anxo M. Lorenzo, e o director da Axencia Galega das Industrias Culturais, Jacobo Sutil. Un ano máis, a Administración autonómica é a principal entidade financiadora da Feira das Culturas Galegas, á que contribúe cunha achega económica de 90.000 euros, ademais de coa organización directa e a promoción dun destacado número de actividades incluídas no programa de 2025.

Actividade no expositor institucional

Unha decena delas terán lugar no expositor da Xunta de Galicia, onde esta mesma tarde se presenta o proxecto A regueifa chega ao teatro, de Ainé en coprodución co Centro Dramático Galego e o FIOT de Carballo, con Lupe Blanco, Josinho da Teixeira, Manolo Maseda e Touriñán.

Ao longo do sábado, o expositor institucional acollerá catro pases da proposta circense Sen patrón, a cargo da compañía Pistacatro, recente Premio Nacional de Circo, así como dúas quendas do obradoiro A árbore dos desexos. Un Nadal no Gaiás, pensado para promover a reciclaxe e a creatividade entre a cativada. Na tarde desa segunda xornada feiral, a compañía iXa ofrecerá unha performance a partir da montaxe de danza 52 Blau, coproducida polo Centro Coreográfico Galego.

Xa o domingo, este mesmo espazo será o escenario para dúas sesións de contacontos con Cris de Caldas, outras dúas de maxia con Óscar Fernández, o inicio da proposta Ven e baila coa participación do Grupo de Música Tradicional de Galicia, e a entrega dos premios do público aos mellores proxectos de videoxogos galegos no marco da mostra organizada pola asociación Videoxogo.gal en colaboración da Consellería de Cultura, Lingua e Xuventude.

Ademais, durante os tres días de feira o stand da Xunta ofrecerá, da man da Cidade da Cultura de Galicia, unha ducia de pases para visionar a instalación de realidade virtual Castelao. Mirar por Galicia.

Espectáculos de apertura e peche

Entre a programación promovida pola Consellería de Cultura, Lingua e Xuventude nesta 18ª edición, destacan así mesmo os espectáculos de apertura e de clausura. A danza protagonizou hoxe o primeiro deles, Saias do mar, a cargo de Artístika Producciones en coprodución co Centro Coreográfico galego. Pola súa banda, Óscar Ibáñez & Tribo pechará a feira co concerto que ofrecerá a última hora da tarde do domingo.

Outras citas destacadas son a presentación este mediodía de Memorias dun neno labrego, espectáculo a partir da icónica novela de Neira Vilas que o Centro Dramático Galego prepara xunto a Contraproducións, os denominados Circo-Cafés do Encontro de Formación e Innovación en Circo D10!, o avance de Pensión incompleta, primeira serie televisiva nas catro linguas oficias do Estado que Voz Audiovisual produce para TVG, EITB e 3Cat con subvención da Xunta; ou as xornadas Somos Cultura Somos Coop, organizadas por EspazoCoop con motivo do Ano Internacional das Cooperativas.