Nova: López Campos asina con Oliver Laxe o convenio para a promoción internacional de ‘Sirat’ na carreira dos Oscar
27/11/2025
López Campos asina con Oliver Laxe o convenio para a promoción internacional de ‘Sirat’ na carreira dos Oscar
A Xunta de Galicia inviste 50.000 euros na campaña exterior do filme para contribuír a aumentar as súas posibilidades de chegar á fase final da 98ª edición destes galardóns
A película acadou tamén nove candidaturas aos Premios do Cine Europeo, ademais de optar ao de mellor película internacional nos BIFA do cine independente británico
Navia de Suarna (Lugo), 27 de novembro de 2025
O conselleiro de Cultura, Lingua e Xuventude, José López Campos, e o director de cine Oliver Laxe asinaron hoxe en Navia de Suarna o convenio de colaboración a través do que a Xunta de Galicia inviste 50.000 euros na campaña de promoción internacional da película Sirat como candidata oficial de España para optar ao Oscar á mellor película internacional.
José López Campos e Jacobo Sutil, director da Axencia Galega das Industrias Culturais, foron recibidos polo cineasta en Casa Quindós, sede da Asociación Ser na aldea de Vilela, no corazón dos Ancares, onde tamén tiveron a oportunidade de coñecer máis de preto o proxecto cultural que Laxe desenvolve na súa antiga casa familiar.
O titular de Cultura do Goberno galego aproveitou a visita para felicitalo persoalmente polos éxitos que a súa cuarta longametraxe está a colleitar neste camiño cara aos Oscar. Así, conta tamén con nove candidaturas aos Premios de Cine Europeo, ademais de optar ao de mellor película internacional nos BIFA (British Independent Film Awards). O filme, que xa se alzou co premio do xurado na súa estrea na sección oficial do Festival de Cannes, conseguiu tamén o Hugo de Ouro no de Chicago.
Sirat atópase agora en plena campaña para impulsar o seu posicionamento entre o resto das candidatas internacionais e acadar a máxima visibilidade entre os membros da academia estadounidense que votarán nesta 98ª edición dos Oscar. Con este obxectivo, volve contar co apoio económico da Xunta, que xa cofinanciara a súa produción cunha subvención de 260.000 euros.
Este novo investimento responde tanto ao alto valor artístico e técnico da película como á oportunidade única que para o conxunto do audiovisual galego supón o feito de contar cunha embaixadora nos premios máis relevantes e mediáticos do panorama mundial. De feito, esta é a primeira vez que un director galego é seleccionado para representar a España nos Oscar e faino, ademais, cun filme con participación galega na súa produción.