Nova: López Campos traslada a importancia de adaptar a Lei de Patrimonio Cultural para axilizar trámites e garantir unha protección máis eficaz

Ourense, 4 de novembro de 2025

O conselleiro de Cultura, Lingua e Xuventude, José López Campos, iniciou hoxe en Ourense a rolda de contactos que manterá nos vindeiros días con todos os representantes de concellos para informar sobre as modificacións previstas na Lei de acompañamento dos Orzamentos para a Lei 5/2016 do Patrimonio Cultural de Galicia. Trátase duns cambios cos que o Executivo autonómico pretende adaptar o texto á actual realidade para “axilizar trámites e garantir unha protección máis eficaz do noso patrimonio cultural”.

Neste senso, o responsable autonómico de Cultura, acompañado polo delegado territorial da Xunta en Ourense, Manuel Pardo, e polo director xeral de Patrimonio Cultural, Ángel Miramontes, precisou que o obxectivo desta modificación é “desburocratizar o procedemento para, en definitiva, reducir os tempos de espera por parte da cidadanía e as institucións”. “A Xunta de Galicia é a única administración autonómica que actualmente informa dos bens de todo o territorio e con independencia de cal sexa o seu grao de protección”, afirmou López Campos antes de engadir que isto tradúcese en que a Dirección Xeral de Patrimonio Cultural xestiona cada ano máis de 30.000 expedientes cun tempo de espera aproximado de entre seis e 12 meses, dependendo da provincia, a tipoloxía ou a afectación do elemento.

“Somos conscientes de que estes longos tempos de espera son un problema á hora de levar a cabo determinados proxectos”, explicou o conselleiro. Así, co fin de buscar unha solución, o departamento de López Campos propón suprimir a necesidade de autorización por parte da Administración autonómica en determinadas cuestións que poderán ser resoltas polos propios concellos. “Trátase dun cambio que propoñemos poñendo o foco nas necesidades dos galegos e galegas, pero sen perder de vista a importancia de protexer o noso legado”, indicou.

Neste senso, tal e como precisou, as entidades locais poderán, xunto co procedemento de concesión de licenza, autorizar intervencións en aqueles elementos que conten con protección estrutural e ambiental ou en Bens de Interese Cultural e catalogados ao tratarse de obras menores como limpeza de fachadas, cambios de pavimento ou reparación de vías. Así mesmo, mediante esta proposta os concellos tamén poderán informar sobre obras no ámbito dos Camiños de Santiago catalogados (Inglés, Portugués, Fisterra-Muxía, Vía da Prata e Inverno) que non afecten á traza, parcelas lindeiras e elementos funcionais, de todas as que se leven a cabo nos municipios de máis de 50.000 habitantes e das que se pretendan realizar no resto do territorio histórico.

A Consellería de Cultura, Lingua e Xuventude, pola súa parte, manterá as competencias para autorizar actuacións nos elementos máis singulares ou que precisan a intervención dun persoal técnico con coñecementos máis específicos. É o caso, por exemplo, de obras en Bens de Interese Cultural, nos elementos con protección integral, nos Camiños de Santiago declarados BIC (Francés e Norte) ou no patrimonio artístico, arqueolóxico ou naquel que sexa propiedade da igrexa.

No ámbito forestal, a lexislación tamén prevé cambios ao introducir a figura de declaración responsable para as cortas de arboredo en bens con protección estrutural e ambiental, así como no seu contorno de protección e zona de amortecemento, ou para as que se realicen no territorio histórico dos Camiños de Santiago catalogados a partir dos 3 metros a ambos lados da traza. Neste marco, cómpre aclarar que se elimina a necesidade de permiso para os traballos de silvicultura feitos por medios manuais ou para as tarefas feitas con maquinaria lixeira, sempre e cando se faga despois de balizar.