Nova: A Xunta declarará Ben de Interese Cultural o Muíño das Mareas da Seca

A Xunta declarará o Ben de Interese Cultural o Muíño das Mareas da Seca, situado en Cambados, na categoría de lugar de valor etnolóxico. Así se anunciou hoxe no Consello da Xunta, onde se informou que o procedemento de incoación se porá en marcha este mesmo mes, coa publicación no Diario Oficial de Galicia, o que suporá a protección inmediata deste espazo.

Co inicio deste trámite, o Goberno galego busca dotar esta infraestrutura sobranceira coas máximas medidas de protección para salvagardala como expresión relevante e significativa da identidade a cultura e as formas de vida do pobo galego.

Tal e como describen os técnicos da Consellería de Cultura, Lingua e Xuventude, o Muíño da Seca é un dos escasos exemplos de muíños de marea que queda nas costas galegas e representa un testemuño excepcional dunha tradición cultural practicamente desaparecida e moi significativo do amplo período histórico no que se desenvolveron este tipo de instalacións, así como da identidade, a cultura e as formas de vida do pobo galego.

Cómpre lembrar que o uso principal e característico deste espazo foi o de instalación de moenda e transformación de cereal en fariña, ademais de ser usado como vivenda da familia encargada da instalación e posteriormente corte do gando. Ademais, o edificio foi obxecto dunha rehabilitación integral en 1995 que o transformou para dedicalo a fins expositivos e na actualidade só funciona de xeito puntual como espazo expositivo.  

Ademais do seu valor etnolóxico, pódeselle atribuír valor histórico, dada a súa antigüidade e vinculación coa historia dos asentamentos de Fefiñáns e Cambados e un gran valor arquitectónico, xa que é mostra da arquitectura tradicional de carácter rural.

O contorno de protección proposto do Muíño das mareas da Seca comprende os espazos e construcións próximos cuxa alteración pode incidir na percepción e comprensión dos valores culturais do ben no seu contexto ou poida afectar a súa integridade, apreciación ou estudo. Con este fin, tomáronse como referencia algunhas das delimitacións urbanísticas, as infraestruturas existentes, as rúas e o parcelario. A delimitación proposta abrangue unha superficie de 578.314 m², gran parte da cal está constituída polas augas do mar.