Nova: Anxo M. Lorenzo anima a visitar no Museo do Mar a mostra ‘Máis aló’ con pinturas de Joaquín Moldes
27/08/2025
Anxo M. Lorenzo anima a visitar no Museo do Mar a mostra ‘Máis aló’ con pinturas de Joaquín Moldes
O director xeral de Cultura visita nos seus últimos días de apertura a exposición, que conta con 43 obras relacionadas co mar nas que o autor usa materiais de refugallo
Lembra que se trata de creacións que comezou a realizar o artista de Sanxenxo hai poucos anos, cando foi diagnosticado con párkinson
O representante da Xunta salienta que “os nosos equipamentos culturais facilitan o achegamento entre o público e diferentes universos artísticos”
A proposta forma parte da campaña de verán ‘Para gustos, cultura’, posta en marcha pola Consellería de Cultura, Lingua e Xuventude con máis de 3.400 actividades
Vigo, 27 de agosto de 2025
O director xeral de Cultura, Anxo M. Lorenzo, visitou no Museo do Mar de Galicia, en Vigo, a exposición Máis Aló, de Joaquín Moldes, animando á cidadanía a visitar a mostra que chega ao final da súa estadía temporal neste centro o vindeiro domingo.
Neste senso, o representante da Xunta destacou que “unha vez máis os nosos equipamentos culturais están ao servizo da sociedade para acoller todo tipo de propostas, encamiñadas a facilitar o achegamento entre o público e diferentes universos artísticos”. É o caso, puntualizou, desta oportunidade para contemplar “o traballo dun artista autodidacta” que emprega material de refugallo recollido de contedores e puntos limpos para realizar as súas obras, cun carácter expresionista.
Ademais, lembrou que se trata dunha produción artística “moi singular” que comezou fai uns anos, cando Joaquín Moldes, nado en Sanxenxo, foi diagnosticado de párkinson e decidiu empregar a pintura, unha das súas maiores paixóns, para exercitar e mellorar a súa destreza manual.
Así, o Museo do Mar de Galicia acolle ata finais de mes un percorrido por 43 pezas nas que o protagonista é o mar e todo o que xira ao seu redor, desde o traballo ata distintos festexos e celebracións.
A mostra forma parte das 43 exposicións incluídas na campaña de lecer cultural deste verán, Para gustos, cultura, posta en marcha pola Consellería de Cultura, Lingua e Xuventude con máis de 3.400 actividades en 200 concellos, que se levan desenvolvendo desde xuño e rematan en setembro.