Nova: As obras premiadas co Barriga Verde de textos para monicreques chegan ás librarías da man da Xunta e Baía Edicións
20/08/2025
As obras premiadas co Barriga Verde de textos para monicreques chegan ás librarías da man da Xunta e Baía Edicións
‘Manchea’, de Andrea Freire, e ‘O Faro’, de Carlos Labraña, incorpóranse á colección que recolle os textos galardoados nas modalidades para público infantil e adulto deste premio convocado pola Consellería de Cultura, Lingua e Xuventude
Santiago de Compostela, 20 de agosto de 2025
As dúas obras vencedoras na última convocatoria do Premio Barriga Verde de textos para teatro de monicreques, nas súas modalidades para público infantil e adulto, acaban de ver a luz na colección que a Xunta de Galicia mantén con Baía Edicións para incorporar ao sistema literario galego os textos recoñecidos con este galardón da Consellería de Cultura, Lingua e Xuventude.
Manchea, co que Andrea Freire se alzou co devandito premio na categoría de monicreques para a rapazada, e O Faro, polo que Carlos Labraña gañou na modalidade para adultos, están xa dispoñibles tanto na Libraría Institucional da Xunta como nos principais puntos físicos de venda.
O primeiro dos títulos, que fai o número 20 da colección Barriga Verde, publícase acompañado das ilustracións de Lola Villar Pérez. Manchea desmonta moitos dos tópicos arredor dos contos tradicionais de princesas, cabaleiros e dragóns a través dunha historia en verso, pero tamén en prosa, que aborda os estereotipos, a autoafirmación, a discriminación e a inclusión. Nunha disparatada aventura, os seus personaxes percorren o Titiriverso, un espazo onde monicreques de luva, de fíos e sombras chinesas.
Pola súa banda, O Faro incide na potencialidade da linguaxe dos monicreques para tratar temáticas duras e de alcance universal. Neste caso, Carlos Labraña recupera a figura de Anselmo Vilar, o fareiro galego de Torre del Mar (Málaga), que mantivo as luces apagadas para axudar as miles de persoas que fuxían durante A Desbandá, un dos episodios máis terribles e esquecidos da guerra civil.
Esta coedición con Baía enmárcase na colaboración que a Xunta mantén con diferentes editoriais para a publicación dos premios de literatura dramática que convoca bienalmente co fin de incentivar a escrita teatral na nosa Comunidade e de impulsar a súa proxección social. Así, ademais dos títulos vencedores do XVI Barriga Verde, nos próximos meses verán a luz a través de Xerais Incidencia muller pedra, de Avelina Pérez, XXVII Premio Álvaro Cunqueiro para textos teatrais, e O carteiro de Ximaraos, co que Carlos Labraña gañou tamén o XIII Manuel María de literatura dramática infantil.