Nova: A Xunta supervisa o resultado das obras de rehabilitación da igrexa de Santa María de Azougue en Betanzos que contaron cun apoio da Xunta de 450.000 euros

Betanzos (A Coruña), 13 de xuño de 2025

A delegada da Xunta, Belén do Campo, xunto ao co director xeral de Patrimonio Cultural, Ángel Miramontes, e o director territorial da Consellería de Cultura, Lingua e Xuventude, Severino Álvarez, supervisaron o resultado final dos traballos que se  executaron de renovación da cuberta e da sancristía da igrexa do Santa María de Azougue, realizadas grazas a un apoio do Goberno galego de case 450.000 euros.

Tal e como explicou a delegada, este proxecto dá continuidade a outras intervencións, levadas a cabo entre os anos 2021 e 2023, no retablo que tamén contaron cunha achega do Goberno galego de ao redor de 75.500 euros, o que eleva o investimento da Xunta nesta igrexa a máis de 525.000 euros.

Durante a visita, os representantes da Xunta destacaron a importancia desta actuación para preservar e poñer en valor o patrimonio histórico e artístico de Galicia, así como o compromiso da Administración autonómica coa conservación do legado cultural e relixioso dos concellos galegos.

Nesta liña, apuntou que “esta intervención encádrase no compromiso do Goberno galego coa conservación patrimonial neste Concello, somos a administración máis comprometida coa conservación, restauración, investigación e divulgación de bens patrimoniais en Betanzos”.

Intervencións

A igrexa de Santa María de Azougue, declarada Ben de Interese Cultural (BIC), edificouse entre a segunda metade do século XIV e a primeira metade de século XV, e é un dos principais expoñentes do gótico en Galicia e un símbolo do rico patrimonio de Betanzos.

As intervencións acometidas permitiron corrixir patoloxías estruturais, mellorar a cuberta e recuperar elementos arquitectónicos e ornamentais de gran valor histórico, garantindo así a conservación da igrexa e a súa adecuación para o uso relixioso e para visitas públicas.

A  delegada da Xunta explicou que o traballos que se levaron a cabo permitiron resolver os problemas de entrada da auga na sancristía, eliminar as humidades no teito e nos paramentos verticais. Para iso executouse a substitución das cubertas do templo, a sancristía e o acceso ao campanario.  No caso da cuberta de acceso ao campanario, substituíronse tamén as viguetas, táboas e rastreis de madeira de castiñeiro.

A obra tamén contemplou a limpeza das fachadas do templo, incluíndo a eliminación da vexetación, limpeza manual dos paramentos e os elementos arquitectónicos e rexuntado con morteiro de cal naquelas zonas onde foi necesarios e o das xuntas das carpinterías e se colocaron vidros nas ventás que faltan.

Tamén se levou a cabo a colocación dun babeiro na cabeza do resalte do muro sur e a impermeabilización na espadana-campanario cobre. Ademais, na cuberta, que é transitable, polos problemas de humidade realizouse un trasdosado interior ventilado cun canle para a auga que se poida filtrar. Tamén se impermeabilizou a azotea.

Para poder desenvolver os traballos necesarios a Consellería de Cultura, Lingua e Xuventude, asinou unha addenda ao convenio de colaboración coa Diocese de Santiago de Compostela para poñer ao dispor os terreos e inmobles necesarios para a execución das actuacións de conservación e restauración en varios inmobles eclesiásticos, entre os que se atopa esta igrexa.