Nova: López Campos asiste á toma de posesión do novo director xeral de Patrimonio Cultural

Santiago de Compostela, 13 de maio de 2025

 O conselleiro de Cultura, Lingua e Xuventude, José López Campos, asistiu esta mañá á toma de posesión de Ángel Miramontes como director xeral de Patrimonio Cultural da Consellería de Cultura, Lingua e Xuventude, en substitución de Mª del Carmen Martínez.

Ángel Miramontes é doutor en Xeografía pola Universidade de Santiago de Compostela, experto en Sistemas de Información Xeográfica e especialista en Ordenación e Planificación Territorial. Ata este momento, exercía como profesor no departamento de Xeografía da USC, dirixía o Centro de Estudos Eurorrexionais de Galicia e Norte de Portugal e forma parte do grupo de investigación de Análise Territorial do Instituto de Estudos e Desenvolvemento de Galicia. O novo director xeral de Patrimonio Cultural asume este departamento co obxectivo de seguir avanzando na posta en valor dos bens máis senlleiros, acadar o máximo recoñecemento da Unesco para a Ribeira Sacra e avanzar na execución do Plan Catedrais de Galicia, entre outras accións.