Nova: O Festival Ikfem celebra a súa 11ª edición cunha vintena de propostas artísticas e musicais en Tui e Valença Do Miño co apoio da Xunta

Santiago de Compostela, 6 de xullo de 2023

O director xeral de Cultura, Anxo M. Lorenzo, e o director de Turismo de Galicia, Xosé Manuel Merelles, participaron hoxe na presentación do Festival IKFEM que celebrará a súa 11ª edición con máis dunha vintena de actividades artísticas e musicais do 20 ao 25 de xullo en Tui e Valença do Miño co apoio da Xunta de Galicia.

O representante da Consellería de Cultura, Educación, FP e Universidades subliñou a especial presenza do mundo hispano, galego e lusófono nesta nova edición, así como a capacidade do festival para “reforzar os xa sólidos lazos con Portugal” e por ser unha oportunidade para coñecer o patrimonio cultural do sudoeste de Galicia e Norte de Portugal.

Neste sentido, salientou que a maior parte das propostas poderanse gozar desde lugares de especial interese patrimonial como a Igrexa de Santo Domingo e a Catedral de Tui, así como a praza da república de Valença do Miño ou a Igrexa de Ganfei.

Anxo M. Lorenzo, animou a participar no festival e recordou que forma parte das máis de 2.500 actividades culturais que este verán promove a Xunta de Galicia en colaboración con distintos concellos e entidades baixo o lema A cultura galega é un culturON que “demostran a vitalidade do sector cultural galego”.

Variedade de propostas

Pola súa banda, o director de Turismo de Galicia, Xosé Manuel Merelles, salientou que desde Turismo de Galicia se aposta por enriquecer a oferta turística complementaria e a oferta cultural no Camiño de Santiago co apoio a iniciativas como esta.

Merelles destacou o pulo do Camiño Portugués que xa o ano pasado foi a segunda ruta máis empregada para chegar a Santiago, con máis de 93.000 peregrinos, seguindo na mesma posición no que vai de ano, no que xa máis de 39.000 peregrinos escolleron esta ruta para acadar a Compostela.

Finalmente, Xosé Manuel Merelles indicou a aposta por seguir levando a cabo actividades conxuntas con Portugal, o que repercute de maneira moi positiva aos concellos de ambos lados da fronteira.

Haberá distintos concertos e propostas artísticas en lugares como o paseo fluvial, a Catedral e a Igrexa de Santo Domingo en Tui, a praza da República, o Jardim Municipal ou a Igrexa Ganfei en en Valença, entre outras. O Festival IKFEM contará, ademais, con IKFEM Creativa, un espazo colaborativo de promoción do talento local de Galicia e norte de Portugal con música, cociña, moda, danza, teatro, fotografía, pintura, grafiti, poesía, monólogos, videocreación e artesanía.