Os DMBK naceron dos rescoldos doutros proxectos como unha reveladora reacción alérxica á poligamia implícita no pop-rock independente do último lustro. E por suposto encargáronse de facer todo o ruído posible ao seu paso. Tíñanas todas consigo: exudaban técnica e chulería a espuertas e inxectaban grandes doses de chandalismo ao hard-rock canónico de toda a vida conectando o imaxinario cinematográfico de Eloy da Igrexa co proto heavy dos primeiros Led Zeppelin. O seu disco debut, editado en 2019 co selo do Primavera Sound, é un vibrante manual de estilo onde se cruzaban tangencialmente Physical Grafiti con La esquina del viento, Nuevo día con Welcome to Sky Valley e La leyenda del tiempo con Sabotage.