Evento: Arosa Bay

O grupo vilagarcián Arousa Bay presentará este sábado en sociedade o seu segundo disco que leva por título "O teu corpo bolero". Tras o gran éxito de crítica de "Tal como soa", o seu primeiro traballo en estudo, o grupo liderado por Alfonso Galbán traballou nos últimos meses nunha nova compilación de versións de boleros, baladas, cancións mexicanas e portuguesas.

O propio Alfonso Galbán referiuse a este novo traballo como "máis elaborado que o primeiro. Quixemos mellorar e esixirnos máis para que o resultado sexa aínda mellor que o primeiro". Os estudos KSF da Illa foron o lugar onde se gravaron estes quince temas, "botamos moitas horas alí, pero cremos que o resultado vai gustar a todo o mundo. Ademais decidimos gravar novamente na Illa polo trato recibido e para reivindicar o noso. Non fai falta irse a Londres para gravar un disco bo".

Este traballo conta ademais coa colaboración estelar de María do Ceo. A cantante portuguesa canta neste traballo o tema que dá nome ao disco "O teu corpo bolero". A relación de amizade cos membros de Arousa Bay animou á recoñecida intérprete lusa a participar na gravación. Por cuestións de axenda, a propia María de Ceo non estará o sábado en Vilagarcía, pero grazas á tecnoloxía poderase interpretar o tema cedido por ela para a ocasión.