Evento: Maruxa Boga. Recordando a Galicia

Evento de presentación do libro-disco Maruxa Boga. Recordando a Galicia, publicado por aCentral Folque coa colaboración da Secretaría Xeral de Cultura.

A obra presenta a Maruxa Boga, unha das figuras de referencia da emigración galega e pioneira no ámbito da radiodifusión. Boga é, xunto co actor Tacholas, a artífice de Recordando a Galicia, espazo radiofónico emblemático da comunidade de emigrados en Arxentina, que se mantivo en antena desde 1945 ata 1984. Orquestrado segundo unha idea de Castelao, o programa servía como lugar de encontro de intelectuais e artistas e, sobre todo, como vía de difusión da música e as tradicións da comunidade galega en Arxentina.

No acto intervirán o secretario xeral de Cultura, Anxo Lorenzo; María Xosé Porteiro, en representación do Consello da Cultura Galega; o autor, Jesús Blanco Rosas, e Ramon Pinheiro, director artístico da Central Folque.

Pecharán o acto Alejandro Vargas (piano) e Alba María (voz), que interpretarán dous temas recollidos no disco.