Evento: Real Filharmonía de Galicia – (EN)FOCO #4 XACOBEO: Michel Camilo e RFG

A Real Filharmonía de Galicia propón un encontro no que o ritmo se converte en linguaxe común entre tradicións musicais distintas, unindo o legado do sinfonismo norteamericano e a enerxía do jazz latino contemporáneo. Baixo a dirección de Clark Rundell e coa participación ao piano de Michel Camilo, o concerto explora a idea dunha música sen fronteiras estilísticas.
O programa ábrese con Three Latin American Dances (núm. 2 e 3) de Aaron Copland, froito das viaxes do compositor e da súa fascinación polas músicas latinoamericanas. Nestas páxinas, Copland combina a escritura sinfónica co pulso rítmico e a cor instrumental, nunha homenaxe vibrante á cultura musical do continente.
Continúa a velada coa Suite para piano, cordas e arpa de Michel Camilo, unha obra que sintetiza as tres identidades do compositor dominicano: a tradición clásica, o jazz e a música latina. Ao longo dos seus catro movementos, a peza revela tamén o seu interese polo tango e pola fusión de linguaxes como espazo creativo.
Pecha o programa o Concerto para piano núm. 1 (1997), unha obra de grande forza expresiva que se desprega como unha viaxe sonora: desde atmosferas líricas e cinematográficas ata un final de virtuosismo explosivo no que piano e orquestra alcanzan unha intensidade rítmica e emocional excepcional.
VEN 16 ABR (20 €) Concerto incluído no Abono (EN)FOCO XACOBEO Auditorio de Galicia, 20.00 h