Evento: Real Filharmonía de Galicia – Paisaxes da alma

A Real Filharmonía de Galicia reúne neste concerto a compositora residente Magnus Lindberg e a pianista residente Eva Gevorgyan nun programa que explora a memoria, a paisaxe e a capacidade da música para transformar a experiencia persoal en emoción compartida. Baixo a dirección de Julia Cruz, a proposta transita entre a creación contemporánea, o Romanticismo nórdico e un dos cumios do repertorio sinfónico.
O programa ábrese con Absences, de Magnus Lindberg, unha obra composta en 2020 a partir de materiais inspirados en Beethoven. A través da cita, a evocación e a transformación, o compositor finlandés establece un diálogo entre pasado e presente, convertendo a memoria musical nun espazo de creación.
Continúa o concerto co Concerto para piano en La menor de Edvard Grieg, unha das obras máis celebradas do repertorio romántico. Nela, o compositor noruegués combina a brillantez pianística cunha escritura de grande riqueza melódica e expresiva, incorporando ecos do folclore escandinavo nunha partitura de marcada personalidade.
Pecha o programa a Sinfonía núm. 6 en Fa maior, Pastorale, de Ludwig van Beethoven. Composta como unha homenaxe á natureza, a obra transforma en música a contemplación da paisaxe, evocando regatos, tormentas e cantos de paxaros mediante unha extraordinaria imaxinación orquestral. Fronte ao dramatismo doutras creacións do compositor, a Pastorale ofrece unha visión serena e profundamente humana do mundo.
Coa participación do estudantado da EAEM.