Evento: Real Filharmonía de Galicia – Concerto de Reis: O crebanoces

A Real Filharmonía de Galicia celebra o tradicional Concerto de Reis cunha proposta que recupera o universo máxico da infancia a través da música para ballet. Baixo a dirección de César Ramos e cunha posta en escena con dramaturxia de Lorena Conde, o concerto combina música, teatro e narración para ofrecer unha experiencia escénica pensada para todos os públicos.
O programa está dedicado a O crebanoces de Piotr Ilich Chaikovski, unha das obras máis emblemáticas do repertorio sinfónico e coreográfico. Inspirado no mundo fantástico de E. T. A. Hoffmann, o ballet estreouse en 1892 e converteuse nun dos grandes clásicos universais grazas á súa extraordinaria riqueza melódica e orquestral. Secuencias como a Danza da Fada de Azucre, o Valse das flores ou as danzas do País dos Doces amosan o dominio de Chaikovski na creación de atmosferas cheas de cor, fantasía e emoción.
A través da intervención de Xoán Fórneas e Carla Mojón, o público acompañará a Clara na súa viaxe soada tras recibir un crebanoces na noite de Nadal, nun percorrido que transforma o escenario nun espazo de imaxinación suspendido entre a realidade e a fantasía.