Evento: Real Filharmonía de Galicia – Contrafactum

A Real Filharmonía de Galicia presenta un programa que explora o diálogo entre tradición e creación contemporánea, entre memoria musical e renovación estética. Baixo a dirección de Jordi Francés, a orquestra constrúe un percorrido no que conviven a estrea absoluta dunha nova obra, un gran concerto romántico e unha das sinfonías máis emblemáticas do século XX.
O programa ábrese con Contrafactum, de Josep Planells, unha estrea absoluta inspirada en pezas de órgano de Cabanilles que establece unha ponte entre épocas e linguaxes musicais afastadas no tempo. A continuación, a pianista en residencia Eva Gevorgyan interpreta o Concerto para piano e orquestra núm. 1 de Rachmaninov, unha obra xuvenil de extraordinaria enerxía, marcada pola intensidade melódica e a riqueza harmónica do compositor ruso. Na segunda parte, a Sinfonía núm. 5 en Mi bemol maior de Jean Sibelius desprega toda a súa forza expansiva, combinando tradición centroeuropea e inspiración nórdica nunha partitura de grande alento épico. O concerto contará coa participación do estudantado da EAEM.
A cita será o xoves 12 de novembro ás 20:00 horas no Auditorio de Galicia. Ás 19:15 horas, na Sala Mozart, terá lugar unha nova sesión de Conversando con…, nesta ocasión con Jordi Francés e Eva Gevorgyan. Entradas: 18 €.