Evento: BachCompostela-Luz nacente. Advento e Nadal

A Catedral de Santiago de Compostela acolle BachCompostela, un proxecto excepcional que levará á interpretación íntegra da obra para órgano de Johann Sebastian Bach en 21 concertos, coincidindo co Ano Santo Compostelán 2027 e co 50 aniversario do órgano Mascioni da Catedral. Os concertos, interpretados polo organista Juan de la Rubia, celebraranse os segundos xoves de cada mes entre outubro de 2026 e decembro de 2028. Organista titular da Basílica da Sagrada Familia de Barcelona e recoñecido intérprete internacional, Juan de la Rubia é unha das grandes referencias actuais na interpretación da obra de Bach.
Luz nacente propón un percorrido musical polo Advento e o Nadal a través dalgúns dos corais máis inspirados de Bach. O programa evoca a espera, o anuncio e a celebración do nacemento de Cristo mediante melodías cheas de simbolismo, recollemento e ledicia. Un concerto no que a espiritualidade luterana e a riqueza expresiva do órgano crean unha atmosfera especialmente evocadora destas datas.