Evento: O Galiverso comeza na Biblioteca Ánxel Casal

Prepárate para vivir unha experiencia única sen saír da biblioteca!

Esta iniciativa emprega as tecnoloxías inmersivas e de realidade virtual co obxectivo de amosar o noso patrimonio material e inmaterial (artístico, industrial, arquitectónico, natural, etc.) dun xeito diferente. Sen saír da biblioteca, poderedes viaxar en globo polo escarpado Canón do Sil, ollar A Coruña desde o alto da lanterna da Torre de Hércules ou descubrir o templo romano de Santalla de Bóveda, entre outras experiencias.

Hai lugares que só poderedes visitar entrando no Galiverso, como a Cripta do Apóstolo, —pechada ao público xeral na propia Catedral de Santiago— e outros que polas súas características ou localización non resultan fáciles para as persoas con dificultades de mobilidade, como os tellados da Catedral de Tui. O uso da realidade virtual facilita gozar deles dunha maneira única, accesible e respectuosa coa súa conservación.

Actividade realizada coa colaboración da Consellería de Educación, Ciencia, Universidades e Formación Profesional.

Dirixida a público de 8 a 99 anos (as persoas menores de 12 deberán estar acompañadas en todo momento).

As persoas interesadas poderán recoller o convite no mostrador de información a partir das 16:30 h. Realizaremos 6 quendas de 20 minutos para grupos de 8 persoas, das 17 ás 19h.