Evento: Somos un Ribeiro diverso

“Somos un Ribeiro diverso” é un proxecto que conecta diversidades: a da colección etnolóxica e a da comunidade á que esta desexa representar. Os seus principais obxectivos son ampliar o foco, buscar novos relatos, repensar que son ou poden ser os obxectos museísticos e presentar a etnoloxía como unha vía para construír unha sociedade máis empática.

A mediadora cultural, Aida Lojo, traballou con nenos e nenas de 8 e 9 anos como axentes do contexto cultural no que viven, valorando as súas particularidades individuais dende o respecto aos demais. Partindo do xogo e das conversas xurdiron temas vinculados á diversidade social -pasada e presente- e aos museos, que foron recollidos en imaxes pola ilustradora María Nóvoa.

Todo este material, tanto o aportado polos rapaces como os debuxos da ilustradora, constitúen un pequeno espazo expositivo que se inaugurou contando coa presenza dos protagonistas.