Evento: La Gorgona

A mitoloxía helena fala de tres gorgonas (Medusa é a máis famosa delas) que convertían os homes en pedra cando estes contemplaban o seu rostro. Nalgures en Centroeuropa, no lugar ficticio de Vandorf, unha delas mora nun castelo. Asasina en lúa chea. As autoridades locais tapan estes crimes de maneira inexplicable, fabrican probas falsas para ditar vereditos no seu propio interese. A que teñen medo? Que agochan? Cando o profesor Jules Heitz acode á localidade para asistir ao xuízo do seu fillo morto, ao que cargan cun dos asasinatos, tentará limpar o seu nome, expoñendo a rede de complicidades e a lei do silencio que reina na vila.