Evento: Festa da Pataca

A Festa da Pataca celébrase anualmente o terceiro domingo de setembro e as súas orixes remóntanse ao ano 1980. Nela únense patrimonio, tradición e gastronomía. Trátase dunha manifestación cultural e social de enaltecemento do produto da pataca de Coristanco, froito nesas terras da dedicación ao traballo de agricultores e produtores.
Esta festividade ten a súa orixe na necesidade de dar a coñecer a calidade do produto gastronómico que atopa na terra de Coristanco un óptimo lugar para o seu cultivo, pola conxunción da climatoloxía húmida e temperada xunto coas condicións do seu solo. Foi unha das primeiras festas gastronómicas de Galicia e naceu nun momento de predominio do traballo agrícola e de cultura enraizada na vida rural.
Durante varios días celébranse concursos gastronómicos, exposicións variadas , concertos, presentación de diferentes pratos con patacas, figuras con patacas, venda de produtos locais,rutas de petiscos... O domingo comeza cunha concentración e desfile de tractores engalanados.