Evento: Entre presenzas e ausencias

Con motivo da celebración do mes do Alzhéimer, coa conmemoración do seu día mundial o vindeiro 21 de setembro, organízase a mostra artística Entre presenzas e ausencias, comisariada pola artista Beatriz S. Saá. 
A exposición está composta por máis de setenta obras realizadas por enfermos de Alzhéimer en fase moderada-avanzada, e os seus coidadores e excoidadores, no programa de didáctica artística CoidArte, deseñado e implementado pola artista e docente Beatriz S. Saá, fai uns meses. Froito da súa investigación na área da arte e saúde e feitos en colaboración con AGADEA (Asociación Galega de Axuda aos Enfermos con Demencia Tipo Alzhéimer). Esta mostra faise coa intención de desestigmatizar e dar visibilidade a importante labor que os coidadores realizan a diario en relación á enfermidade de Alzhéimer, na que os doentes, xa en fases avanzadas, dependen por completo destas figuras.