Patrimonio: GALICIA NA UNESCO

GALICIA NA UNESCO

Elementos galegos recoñecidos polo organismo internacional

A fins de novembro de 2018, a Unesco recoñecía como Patrimonio Cultural Inmaterial a pedra en seco, unha técnica de construción tradicional na nosa terra que se convirte así no primeiro elemento inmaterial en recibir esta distinción en Galicia.

Ler máis

Esta modalidade de construción, na que non se emprega ningún tipo de argamasa ou morteiro para unir a pedra, logrou entrar na lista representativa do patrimonio inmaterial da Unesco da man dunha candidatura internacional liderada por Grecia e Chipre, e que contou tamén coa participación de Suíza, Croacia, Eslovenia, Francia, Italia e España. Aquí, ademais de Galicia, estiveron representadas as comunidades de Andalucía, Aragón, Asturias, Baleares, Estremadura, Cataluña e Valencia.

Aínda que este sexa, ata a data, o único recoñecemento a un elemento inmaterial na nosa comunidade, cómpre lembrar que Galicia ten máis bens incluídos no listado de Patrimonio Mundial da Humanidade da Unesco. O primeiro en incorporarse a este clube foi o casco histórico de Santiago de Compostela, no ano 1985; os camiños que levan á capital galega e que foron as rutas tradicionais de peregrinación tardarían algo máis. Foi en 1993 cando este prestixioso organismo internacional decidiu sumar o Camiño Francés, ao que 22 anos despois seguirían as rutas dos Camiños do Norte.

muralla romana de Lugo, que data do século III d.C., tería que esperar ata o 2000 para entrar na lista da Unesco. O último monumento galego en lograr o título de Patrimonio Mundial da Unesco, con dous milenios de historia ás súas costas, foi a Torre de Hércules. Con estas distincións, a Unesco referenda o vasto legado histórico e cultural que os nosos devanceiros deixaron en Galicia.

  • Construción coa técnica de pedra seca Construción coa técnica de pedra seca
  • Casco histórico de Santiago de Compostela | Imaxe:Turismo de Galicia Casco histórico de Santiago de Compostela | Imaxe:Turismo de Galicia
  • Camiño de Santiago Camiño de Santiago
  • Muralla de Lugo | Imaxe:Turismo de Galicia Muralla de Lugo | Imaxe:Turismo de Galicia
  • Torre de Hércules | Imaxe: Turismo de Galicia Torre de Hércules | Imaxe: Turismo de Galicia

Comparte